Actionkomedie

Regi: David Leitch

Deadpool 2

Med: Ryan Reynolds, Josh Brolin, Zazie Beetz

Superhelt Deadpool (Reynolds) svinsar rundt i Marvel-universet for å drepa slemmingar. Når dama døyr, vil han helst drepa seg sjølv òg. Det går ikkje så bra, både fordi han ikkje kan døy og sidan han må fiksa trøbbel frå framtida som hemnlystne Cable (Brolin).

Ryan Air

Kor mange pengar kan du bruka på å laga ein teit, tullete og ekstremt tynn film som Deadpool 2? Ut frå spesialeffektar og tal på bilkrasj er nok mange pengar eit ganske nøyaktig estimat. Men blir det god film av det? Nei, ikkje noko særleg. Samtidig er det noko nesten rørande over å sjå slike actionkomediar som både prøver tekkast kjernepublikummet og fri til dei meir politisk opptekne, til krampen tek dei. Men køyr på: Når dei klarar så til dei grader å lessa ned filmen i kvite muskelmenn, er det minste dei kan gjera, å prøva å nyansera humoren og ta inn nokre velretta spark mot antifeminisme, rasisme og kulturell appropriasjon. Takka vera Ryan Reynolds sjarmerande vesen og til dels artige, kjappe replikkar, ler eg innimellom.

Ta på meg

Når det gjeld å representera kvinner og folk med annan hudfarge enn deig, er Hollywood rett og slett merkeleg elendige. Og heilt seriøst: Kan ein snart berre slutta å kødda med indisk aksent? Set heller inn litt innsats på manus og meir spennande handling. For det er tynne greier, dette her, altså. Det tjukkaste er musikkbruken, og dei ørten referansane til alt frå A-ha til Robocop. Og ein film som siterer Ace Ventura, vil alltid til dels sleppa unna med det for min del.

Brit Aksnes

Brit Aksnes er frilans kulturarbeidar og fast filmmeldar i Dag og Tid.