Familiefilm

Regi: Rune Spaans, Gunhild Enger

Knutsen & Ludvigsen 2 – Det store dyret

Stemmer: John Brungot, Hermann Sabado, Heidi Goldmann, Anne Grete Preus, Per Inge Torkelsen
Kinofilm

Knutsen og Ludvigsen vert truga med utkasting frå tunnelen av den strikse Konduktøren. Dei bestemmer seg for å leita etter Knutsens beintøffe sjørøvarkapteinbestefar, men Konduktøren har ei fly forbanna syster som er oppsett på å få fatt i det som skjuler seg i tunnelen.

Animaniacs

Det er gått fem år sidan Knutsen & Ludvigsen og den fæle Rasputin drog ungar, både dagens og dei som eingong sleit ut Juba juba på platespelaren på åttitalet, til kinoen. Den opplagte oppfølgjaren måtte koma, og bra er det. Så høgt nivå på kommersielle norske produksjonar er ei glede å sjå og høyra.

Eg har ikkje noko særleg nært og nostalgisk forhold til musikken, men til og med utan at foreldra mine hadde sørgt for at platene var i samlinga heime, hoppar låtane fram frå gløymselen, av og til som små meisterstykke. Eg reflekterte heller aldri over kor mykje absurd det var i opplegget til Øystein Dolmen og Gustav Lorentzen, både tekstar, utsjånad og framtoning. Såleis representerer begge filmane, som er baserte på bøkene til Øystein Dolmen, denne galskapen på nydeleg og tøysete vis.

Himmelsk

Det er endeleg ting ein kan reagera på og tenkja at er på grensa til innanfor. Lakrisbåtane som gjev positive LSD-syner, er det god ruspolitikk? At dei leitar i himmelen for å finna bestefaren, er ikkje det å gå ut frå at det er kristendommen som gjeld? Det får våga seg, og her er nok av politisk korrekte tvistar til å gjera opp for dette.

Himmelscenane er fantastisk morosame, og den eksistensielle malstraumen dei hamnar i, viser animasjonshumor på sitt aller beste og kløktigaste. Det som går over hovudet på dei minste, går mest sannsynleg ikkje utover opplevinga deira, slik eg sjølv hugsar teiknefilmar som utstyrteleg artige sjølv om eg ved attersyn skjønar at eg ikkje kan ha forstått bæret. Og så kan han nok tidvis vera skummel for dei sartaste småingane, men til og med Det store dyret er berre superkozemozeleg, så eg ville ikkje nølt med å ta med heile familien på Knutsen og Ludvigsens nylegaste syretripp.

Brit Aksnes

Brit Aksnes er frilans kulturarbeidar og fast filmmeldar i Dag og Tid.