Drama / komedie

Regi: Lulu Wang

The Farewell

Med: Amkwafina, Shuzhen Zhao, Tzi Ma, Diana Lin

Billi (Amkwafina) flytta til New York frå Kina saman med foreldra (Ma og Lin) då ho var berre seks år gamal. Med telefonsamtalar til bestemora Nai Nai (Zhao) held ho kontakten (og sitt gamle moderspråk) ved like. Under påskotet av eit bryllaup til søskenbarnet reiser dei tilbake for å ta farvel med Nai Nai, som har fått lungekreft. Men det veit ikkje Nai Nai sjølv.

Det er mange lag ved The Farewell. Trass i den raude tråden klarar dei å unngå dei mange fellene ved forviklingskomediar. Heseblesande kaving er halden på eit minimum, og humoren er mild og underfundig. Heile filmen er eigentleg mild og underfundig, men utan å vera døll. Tvert imot, han er ganske kvass, både i skildring av personlegdomar og kulturkrasj.

Billi framstår som eit svært truverdig eksempel på ein moderne fyrstegenerasjonsinnvandrar i USA. Foreldra snakkar gebrokkent engelsk med henne heime, men identiteten er i ferd med å bli amerikanifisert. Når faren og syskena treffest, er dette eit stadig tema. Billi får skryt fordi ho snakkar godt mandarin, men i skrytet ligg ei sår erkjenning av at ho ikkje er «ekte» kinesisk lenger. Så er heller ikkje Kina slik ho hugsar det – det gamle nabolaget er jamna med jorda og erstatta av høgblokker.

Bestemora representerer såleis mykje meir enn berre nostalgi. Eg vil heller ikkje at den handlekraftige, gamle dama skal døy! Og eg vil helst at filmen ikkje skal ta slutt, for eg kunne sete lenge og sett på den vakre filminga med den perfekt pompøse musikken og den festlege, fine familien til Billi.

Brit Aksnes

Brit Aksnes er frilans kulturarbeidar og fast filmmeldar i Dag og Tid.