Dokumentarserie

Regi: Cullen Hoback

Q: Into the Storm

Med: Fred Brennan, Jim Watkins, Ron Watkins
HBO frå 22. mars

Dei siste par åra dukka ei ny rørsle opp – dei kalla seg QAnon og støtta fullt ut Donald Trump og dei villaste konspirasjonsteoriane nettet kunne takla. Og når det vanlege nettet ikkje orka meir, stod plattformer som 8Chan klare.

Plattforming

Om du er ein podkastslukar, har du kanskje høyrt Rabbit Hole, som mellom anna hamnar nedi holet der internettrørsla QAnon er å finna – den mystiske figuren som klarte å fyra opp ei rekkje ytterleggåande høgrevridde, kristenkonservative YouTube-vertar som gladeleg stiller opp og fortel kvifor dei har slik tru på denne anonyme «fyren». (Alle trur det må vera ein mann.)

Og er det eigentleg ei gruppe som arbeider under namnet Q? Massesuggesjonen til Q over verdsveven førte til at folk blei drepne då Capitol vart storma for eit par månader sidan. Den einaste plattforma som lét han og følgjarane dura på, var 8Chan, ein stad som har tilrettelagd for så mykje guff, inkludert moskéskytinga på New Zealand, der gjerningspersonen verkeleg sette Q på kartet ved å sitera mottoet til QAnon: «Where we go one, we go all», eit sitat teke frå B-filmen White Squall (1996).

Eg blir dregen mot denne slags avsløringsdokumentarar som mot eit bilkrasj – eg vil ikkje eigentleg sjå, men eg klarar ikkje lata vera heller.

Klype salt

Eg har ikkje alltid følt at eg har styr på dei ulike plattformene som lèt til dels farlege, til dels ubereknelege individ få ytra hatefulle utsegner i ytringsfridomens namn. Og bakom 8Chan finst tre særs spesielle fridomskjemparar: ein eksentrisk far–son-duo og multifunksjonshemma Fredrick som sjølv har måtta tola absurd grufull hets på si eiga side.

Regissør og journalist Cullen Hoback har klart å bygga mykje tillit til intervjuobjekta sine, noko som gjer at han har mykje godt materiale å klippa i. Og klippen er alltid avgjerande for ein god dokumentar og for kvar sjåaren vender sympatien sin og motsett.

Hoback og teamet hans byggjer ei fabelaktig underhaldande historie med ei plausibel løysing. Eg vil gjerne tru dei, men alle klippens verkemiddel er tekne i bruk, så eg ser med noko kritiske auge, mens eg føler meg både opplyst og underhalden. Det eg framleis er like usikker på, er korleis QAnon kunne bli så stort. Det er det største mysteriet av dei alle.

Brit Aksnes

Brit Aksnes er frilans kulturar­beidar og fast filmmeldar i Dag og Tid.