Brått verka alle dystopiske framtidsvisjonar med tomme gater og engstelege fjes eit hakk nærare slik me har sett det på film. Berre at no kan me ikkje seia «det er berre på film». Og med eitt treng me å tru på eventyr igjen, eller lulla oss inn i søte draumar, eller verta realitetsorienterte, eller helst ei blanding av alt.

Nettkino

Det kan sjå mørkt ut for dei fleste som har satsa blod, sveitte og tårer i kulturbransjen, så også med norske filmskaparar. Ein bra måte å støtta desse på er ved eit av dei mange ad hoc-tiltaka, i dette tilfellet Nettkino. Det ligg ei røys gode, relativt nye norske filmar her, og det gler meg å kunna trekkja fram ein film eg likte overraskande godt då han kom ut i 2017. Det mest corny med Skyggenes dal er eigentleg tittelen.

Sjølve filmen, debutfilmen til regissør Jonas Matzow Gulbrandsen, er vakker, nydeleg tonesett og har noko overjordisk over seg utan å verka for mykje som fantasy.

«Her er eit fascinerande spenn mellom psykologi, fantasi og barnesinn som er sjeldan vare i norsk film. Hadde du forventa ein skrekkfilm, så er det berre gjennom fantasien til vesle Aslak – og det kan vera skrekkeleg nok», skreiv eg då eg melde filmen den gongen. Det er så eg får lyst å sjå han om att.

Wam! Bam!

Det vert i overkant mykje kvalitetstid med familien, vil ein del småbarnsforeldre ærleg medgje. Om du har barn som har fylt ti, vil eg tilrå ein skikkeleg festleg familiefilm som eg har hatt planar om å sjå lenge, og som just har underhalde meg eit par timar. Shazam! som ligg på Netflix, er akkurat ein sånn type actionkomedie som høver perfekt for både å le og å verta rørt, og kjenna at verda kunne vore full av superskurkar, det slepp me jo for det meste. Tenk Tom Hanks’ gjennombrotsfilm Big (1987) blanda med ei anna teikneseriefilmatisering, Kick-Ass (2010), det er ei ganske dekkande skildring. Den vesle vrien med at helten er fosterheimsbarn, gjer sjølvsagt ikkje at familieidyllen er noko mindre, snarare tvert om.

Seriejafsen

Eg kjenner eg styrer litt unna dei mest makabre sannkrimseriane for tida, men skal du ha ein perfekt miks av FBI-jakt, mafiabindingar, sprø slektningar og enkle svindlarar, håpar eg du abonnerer på HBO. McMillions har alt! FBI fekk for nokre år sidan eit tips om at det store pengespelet som McDonald’s hadde hatt gåande for kundane sine i fleire år, mest sannsynleg var juksa med. Då millionvinnarane viste seg å vera vener eller slekt, gjekk alarmklokkene omsider. Men kva skjedde eigentleg? Korleis kunne så mange vera involverte utan å verta oppdaga? Og kven var den mystiske onkel Jerry?

Brit Aksnes

Brit Aksnes er frilans kulturarbeidar og fast filmmeldar i Dag og Tid.