Dokumentar

Regi: Benoit Bringer

The Caviar Connection

Produsent Lauret Richard

Despoten Ilham Alijev har i 18 år styrt den tidlegare sovjetrepublikken Aserbajdsjan som sitt eige familiefirma. Han har skaffa seg og enorme rikdommar medan folket svelt, all opposisjon blir slått ned på, og regimekritikarar blir fengsla. Men han kan kunsten å sminke imaget sitt ved å invitere store artistar som Lady Gaga, Sting, Jennifer Lopez og andre som er for fattige til å halde seg med etikk. Regimet vaskar seg òg med store sportsarrangement.

Kjøpt sete

Men toppen av kransekaka er korleis landet kjøpte seg sete i Europarådet. Eit utal godt betalte parlamentarikarar frå fleire land – også vestlege – sytte ved avrøysting i rådet for å forkaste rapporten som dokumenterte at Alijev og banden hans heldt seg med mange politiske fangar. Slik blei plassen sikra gjennom utsøkt økonomisk rotenskap; då var ikkje rådets etiske og politiske verdiar mykje verde.

Overtydande

På overtydande vis dokumenterer denne filmen kva som skjedde. Men han lyftar også fram den avgjerande innsatsen den uredde journalisten Khadija Ismayilova gjorde for å avsløre skandalen. Arbeidet hennar bringa parlamentarikarar i fleire land i fengsel, og Aserbajdsjan sleppte ut nokre av dei politiske fangane sine. Men framleis er landet medlem av Europarådet.

Jan H. Landro