Dokumentar

Regi: Even Sigstad, Filip Christensen

Aksel

Med: Aksel Lund Svindal, familie, kollegaer
Kinofilm

Filmteamet følgjer alpinist Aksel Lund Svindal frå krossbanda hans rauk i eit utforrenn i Kitzbühel i 2016, og gjennom rekonvalesens, tilbakekomst og konklusjon.

Kva er viktig?

«Å kjøre rundt på et fjell – hvor viktig er det i verden», seier Aksel i eit av mange augeblikk fanga på minnebrikkene til filmfotografane Espen Saur og medregissør Filip Christensen. Han stiller eit godt spørsmål, men det einaste eg kan koma på som dukkar opp som svar, er enkelt og greitt at han elskar det – samhaldet i skilaget, sporten i seg sjølv, å konkurrera mot seg sjølv og mot andre.

Med to foreldre som sjølv dreiv med alpint, er det ikkje så rart om sønene også fattar same interesse. At han klarar å bli verdsmeister, er ei bragd, sjølvsagt, men eg ser ikkje heilt behovet for ein langfilm med treningsøkter og lune smil og eigentleg usedvanleg lite innsikt i kjenslene og tankane til hovudpersonen.

Glattfin

Filmskaparane er innom nokre viktige familierelaterte problemstillingar, men det meste glir forbi tilsynelatande utan noko anna mål enn å få Aksel i mål, både i overført tyding og i dei mange renna som er med i filmen. Ja, filmen er fint klipt, fint filma, fint lydsett, men han er fint lite anna enn ein rein sportsfilm.

Då blir det for freistande å sitera fritt etter hovudpersonen sjølv: å laga ein nesten to timar lang film om ein rett nok usedvanleg dyktig og sympatisk alpinist som køyrer rundt på ymse fjell, – kor viktig er det i verda?

Brit Aksnes

Brit Aksnes er frilans kulturarbeidar og fast filmmeldar i Dag og Tid.