Dokudrama

Regi: Anne Sewitsky

A Very British Scandal

Med: Claire Foy, Paul Bettany, Julia Davis
Miniserie NRK

Då dei to overklasselevemenneska Margaret (Foy) og Ian (Bettany) møtest rett etter krigen, stormar dei inn i livet til kvarandre og ut av det gamle. Ingenting blir mindre stormfullt av at han arvar eit slott og ein hertugtittel.

Fint skal det vera

Ikkje berre har du sjølve den unge The Crown-dronninga Clare Foy i rolla som hertuginna av Argyll, det er noko med heile koloritten og dei snobbete dialektane som automatisk får tankane til den populære serien om den britiske tronarvingen. Me har tilsynelatande ei usløkkjeleg lyst på dramatiseringar om fintfolk frå gamledagar (Downton Abbey, Bridgerton osv. osb. etc.). Når det i tillegg kan baserast lausleg på noko som har skjedd, då er det verkeleg underhaldningspotensial.

Så får du ein skamdyktig regissør som «vår eigen» Anne Sewitsky, og suksessen er på mange måtar i boks. Men så var det altså dei få måtane eg ikkje likar A Very British Scandal på, som kanskje fyrst og fremst går på at eg ikkje heilt kjenner på kjemien mellom hovudpersonane. Eg kan ikkje seia at eg ikkje blir underhalden, men den store entusiasmen min uteblir.

Love og rett

Sidan det frå starten er førespegla eit heftig rettsdrama, kjenner eg at den forventninga ikkje blir heilt innfridd. Her er pikante intrigar og hårreisande bedrag, men sjølve rettssaka vert ei litt kjapp oppsummering mot slutten, noko som verkar hastig. Bodskapen om at kvinner blir straffa for å vera seksuelle vesen, og at overklassen er hyklersk, kjennest gamaldags på eit vis. Ikkje at eg er ueinig, det berre verkar noko uinspirert eller opplagt.

Å understreka kor sjokkerande promiskuøs hertuginna skal ha vore, for så å forsvara retten hennar til å vera det, framstår nesten hyklersk i seg sjølv, eller kan henda berre lettvint og lite gjennomtenkt. Men no tolkar eg kanskje hardt – til sjuande og sist skal A Very British Scandal vera underhaldning, og kva er vel meir underhaldande enn ei særs britisk skandale?

I tillegg er det vakkert å sjå på, både Bettany og Foy, kleda deira, landskapa, dei herskapelege husa og den lekre filminga av det heile. Det blir likevel for motstandslaust, og sikkert langt frå historisk korrekt, så får ein heller ta stilling til om det ikkje er akkurat det ein av og til vil ha servert i TV-fjeset.

Brit Aksnes

Brit Aksnes er frilans kultur­arbeidar og fast filmmeldar i Dag og Tid.