Skrekk/komedie

Regi: Henrik M.
Dahlsbakken

Prosjekt Z

Med: Eili Harboe, Arthur Berning, Iben Akerlie, Jonis Josef, Myra, Dennis Storhøi
Kinofilm

Ein gjeng filmstudentar reiser ut på bygda for å laga ein zombiefilm, men så skjer det skrekkelege ting med dei sjølve i staden. Eller gjer det eigentleg det?

Lastverk

Det er over tjue år sidan The Blairwitch Project (1999) skapte stor oppstandelse med amatøropptak sette saman til det som skulle førestilla ein ekte film av ungdommar som blir drepne i skogen. Det er vanskeleg å tenka seg Prosjekt Z som anna enn ei hyllest og kanskje eit forsøk på å gjenskapa denne, berre sjølvsagt med nok humor og ironi til å sleppa å ta eventuelle negative samanlikningar på alvor.

Eg er ikkje sikker på kor alvorleg Dahlsbakken har lyst å verta teken for den nyaste av mange produksjonar dei siste åra. Han har ei unik evne til å samla flust av kjende skodespelarar inn i idériket sitt og på eit eller anna vis kverna dei gjennom til ein ferdig film.

Eg er definitivt meir imponert over dette enn over filmar som Gledelig jul (2020) og Rett vest (2017). Det må vera irriterande å få påpeika denne enorme produktiviteten heile tida, men kanskje resultata hadde vorte jamt over betre om han ikkje hadde sånt hastverk med å få alt ut.

Kollektiv moro

Det kjekkaste med Prosjekt Z er kor leiken han er. Det er masse å le av, som tøysing med dialektbruk, referansar til andre filmar, det verkelege livet til skodespelarane, at Jan Vardøen blir nemnd. Det merkelegaste er at trass i raske sceneskift og mykje effektiv klipping består filmen av ei rekkje ganske kjedelege parti som dreg ned tempoet, parti som innlysande er meininga skal vera anten morosame (Storhøi som spelar inn selftape) eller skumle (Akerlie som går inn i eit nedlagt motell og møter zombiar for fyrste gong).

Summen av alt, og hoppinga mellom «ekte» og filming, blir eigentleg ikkje så forvirrande, men det blir heller ikkje særleg fengande, og på ingen måte skummelt, om det på noko tidspunkt var meininga.

Det må ha vore moro å spela inn Prosjekt Z, men resultatet blir også parodisk nærliggande å samanlikna med ein svært vellaga studentfilm.

Brit Aksnes

Brit Aksnes er frilans kulturarbeidar og fast filmmeldar i Dag og Tid.