Hans Aarnes (56) skipa Fonna Forlag i det okkuperte Noreg. Første utgivinga var hans eiga omsetjing av Grunnlova til nynorsk. Det blei nytt opplag i 1945.

Forlagsnamnet var bygdenamnet på heimegarden på Sunnmøre. Forlaget skulle skaffe lesestoff og bruksbøker på nynorsk for store målgrupper. Til og med 2021 var det blitt 408 bøker, 67 årgangar av vekeblad, julehefte og årbøker og 124 teikneseriehefte. Tre av fire bøker var skjønnlitterære. Fonna dreiv også eigen bokhandel i Oslo 1942–77 og dotterselskapet Fonna Publishing Inc. i USA 1956–59.

Aarnes lærte seg nynorsk då han som 12-åring las romanen Brite-Per av Jens Tvedt. Han utdanna seg som kystskipper, men gjennom 50 år skreiv, redigerte og publiserte han aviser, blad og bøker i Molde, Ålesund, Bergen, Kristiansand, Skien og Oslo. Sjølv skreiv han over 30 bøker og småskrifter.

Han hadde det med å skipe institusjonar. Norsk Bladmannalag i 1913, Norsk Pressekontor i 1918, Bladmannaskulen i 1919, Nynorsk Vekeblad i 1933 og Fonna Forlag i 1940. Tidleg i 1950-åra reiste han landet rundt og gav seg sjølv æra for 200 nye mållag.

Nynorsk Vekeblad kom ut regelmessig 1934–54 og var den viktigaste grunnen til at Aarnes skipa Fonna Forlag. På det meste, i 1945, var opplaget vel 32.000 eksemplar.

Aarnes kryssa gjerne grensa til framtida med norske alternativ til amerikansk kulturindustri. Som ei bygdenorsk og positiv motvekt til Knoll og Tott skapte Leif Halse og Jens R. Nilssen Vangsgutane frå hausten 1940. Eit halvt år seinare kom dei første stripene av Hallvard Sandnes (Vigleik Vikli) og Jostein Øvrelid (Ronald Stone) i science fiction-serien Knut Berg på eventyr. Den var eit norsk svar på Lyn Gordon.

Hausten 1941 sette han på trykk «Ny fedrelandssong» av Bjarne Slapgard i Nynorsk Vekeblad: «Men april kom atter med bitande snjo/ og frostnatta takka for sist». Kom det meir slikt, blei redaktøren arrestert, sa sensuren. Redaktøren trykte meir.

Okkupasjonsmakta arresterte tre medarbeidarar som til saman var fengsla i seks månader. Redaksjonssekretær Bergitt Villesvik sat på Møllergata 19 i Oslo, læraren Leif Halse på Ørland og Falstad, og Hallvard Sandnes var på Grini. Både Halse og Sandnes skal ha smugla ut manuskript til Fonna.

Som forleggjar søkte Aarnes mest mot underhaldning og populærkultur. Ideen om Norsk Allkunnebok var han med og utvikla i 1919. Denne viktigaste utgivinga knekte forlaget, men Villesvik berga det som bergast kunne. Då kystskipperen runda 70 år, sa han: «Å tene pengar på nynorsken har gjerne vore om lag like lett som å livberge seg på eit svaberg.»

Ottar Grepstad

Neste veke: Boktrykkjar med romanbibliotek