Vi var mange som ikkje trudde at Russland ville prøva å invadera heile Ukraina for to år sidan. Vi tok feil. Vi var mange som ikkje trudde at ukrainarane ville kunna stå imot den russiske militærmakta. Vi tok feil. Og vi var mange som trudde at den ukrainske offensiven i fjor skulle endra den militære situasjonen, og at Vesten ville levera dei våpena Ukraina ville trenga. Vi tok feil.

Vi var mange som trudde at det ville veksa fram ein opinion i Russland mot krigen. At dei økonomiske sanksjonane ville råka Russland hardt, og at det russiske samfunnet ikkje ville klara å stå i ein krig gjennom lang tid. Vi tok feil her òg.

Slik kan vi halda fram. Det er ikkje mogeleg å vita kva resultatet vert av denne krigen. Vi pliktar likevel å ta tydeleg standpunkt til om vi skal hjelpa Ukraina med nok våpen eller ikkje. Under ein krig kan ein ikkje nøla, og ein må halda fast ved det ein har lova.

Det er vanskeleg å vita kva Putin tenkjer og vil. Er Russland viljuge til å inngå ein fredsavtale og trekkja seg tilbake frå dei okkuperte områda? Eventuelt halda på dei områda dei alt har okkupert, og la det vera med det? Eller vil Russland, om Ukraina gjev etter, til slutt prøva å ta Kyiv? Kan ein i det heile lita på ein fredsavtale med Putin?

Lite tyder på det. Putin har synt seg kynisk i denne krigen og ofrar hundretusenvis av soldatar langs fronten. Titusenvis av russiske soldatar er drepne berre i kampen om Avdijivka, som dei tok kontroll over denne veka. Dei bombar byar og sivile i Ukraina med rakettar frå Svartehavet. Dei fengslar kritikarar i heimlandet. Russland er vorte eit ufyseleg regime, med lagnaden til Aleksej Navalnyj som nok eit tragisk døme.

Ein reduksjon eller stogg i våpenhjelpa vil difor vera ein tragedie for ukrainarane og utgjera ein fare for alle land Russland ser på som sitt historiske interesseområde. Det treng ikkje vera tale om ein militær invasjon, men å sikra seg hegemoni eller ei eller anna form for kontroll med desse landa, slik dei har med Belarus i dag.

Så lenge ukrainarane sjølve vil halda fram krigen, må vi difor støtta Ukraina med det vi kan av våpen og økonomisk hjelp.

Svein Gjerdåker