Jordbrukspolitikk på tinget

Kva skal vi finne på i «Frå matfatet» denne veka? Nei, kva med ein gjennomgang av handsaminga Stortinget gjorde av jordbruksoppgjeret?

Verkeleg? tenker du kanskje. Vedtak som vart gjorde i Stortinget for fleire veker sidan? Jepp, seier eg. Det er nemleg stortingsval i haust, og vel verdt å få med seg korleis politikarane og partia du kan røyste på i stortingsvalet, røystar og uttaler seg i jordbrukspolitikken.

No byrjar vi så keisamt som mogleg. Saksordførar Solveig Vitanza (Ap) sa nemleg klart ifrå alt i opningsinnlegget om at det var sikra fleirtal for innstillinga frå næringskomiteen. Likevel brukte Stortinget tre timar og fjorten minutt på å handsame saka som formelt har namnet «Endringer i statsbudsjettet 2025 under Landbruks- og matdepartementet (Jordbruksoppgjøret 2025)», og det vart handsama 54 forslag.

Ingen av dei forslaga handla om det som frå utsida stod fram som det viktigaste tema i avtalen: intensjonen om tvangsinnføring av metanhemmarar i mjølkeproduksjon. Derimot handla dei om temmeleg mykje anna.

Bevarande endring

Nokre sitat er for gode til å late gå. «Vi må forandre for å bevare», sa den konservative politikaren Lene Westgaard-Halle frå Høgre. Så fremja ho eit forslag om «at bevilgningen på kapittel 1150, post 74, reduseres med 500 mill. kroner» på statsbudsjettet for 2026.