Sjakkverda er lita. Eg følgjer ukrainske, russisktalande vener på sosiale medium. Mange er kjende stormeistrar (GM = grandmaster) frå ein av verdas fremste sjakknasjonar.

27. februar: GM Natalja Zjukova (42), Odessa: Eg er her, i Odessa. Eg blir her. Takk for støtta frå alle som skriv. Nok ein gong: Eg reiser ingen stader. Dette er jorda mi som eg skal verja til det siste.

28. februar: GM Georgij Timosjenko (55) grip til våpen for å verja fødebyen Kyiv. GM Pavel Eljanov (38), nummer 55 på verdsrankinga, mellombels i tryggleik etter sjølv å ha flykta frå Aust-Ukraina til Lviv i vest, publiserer eit bilete av kameraten.

28. februar: Den ukrainske landslagskapteinen GM Oleksandr Sulypa (49) grip til våpen og held vakt i Lviv.

2. mars: Sjakktrenaren Aleksej Druzjinets (47) døyr i kamp i byen Tokmak i Aust-Ukraina.

2. mars: GM Igor Kovalenko (33), topprangert i Fagernes-turneringa, som Lahlum arrangerer i påska i år, legg ut ein amatørvideo der han rapporterer frå Kyiv. Han blir verande i byen for å hjelpa brørne sine som har gripe til våpen.

4. mars: WGM Diana Arutjunova (34), Kyiv: Vener, eg hatar ikkje russarar. Bestemor mi opplevde blokaden av Leningrad.

7. mars: GM Natalja Zjukova, Odessa, blandar seg inn i ein Facebook-diskusjon om deltaking av russiske sjakkspelarar i internasjonale turneringar: KORLEIS kan verda halda det gåande og leva som vanleg når det i Ukraina skjer eit folkemord, ei blodig utrydding av eit fredeleg folk???!!!

7. mars: Internasjonal meister og sjakktrenar Jevgenij Odnorozjenko (42) frå Kharkiv grip til våpen i Ukrainas nest største by, som er særs hardt råka etter russiske åtak i ei veke.

7. mars: WGM Diana Arutjunova, Kyiv: Eg måtte dra frå heimen min, som eg held så høgt. Eg freista halda ut, men i går natt var bombene overalt, vindauga riste. Men eg har overlevd endå ein dag.

Atle Grønn

Atle Grønn er internasjonal meister i sjakk.