Lytt til artikkelen:

Kvifor har vi nyttårsforsett og ikkje nyhaustforsett? Særleg i fyrste del av livet er det jo om hausten livet byrjar på nytt – eller tek heilt nye vegar: Sidan skulane sluttar om våren og byrjar om hausten, er det om hausten vi flyttar heimanfrå for fyrste gong, flyttar til ein heilt ny stad eller får vår fyrste jobb.

Slik som no. For mange av oss er det no vi, for fyrste gong, skal etablere våre eigne vanar. Lage eit liv på våre eigne premissar, utan nokon med meir erfaring fysisk til stades. Sjansane – og utfordringane – kan synast nærast endelause. Mest for dei som flyttar ut, sjølvsagt, men òg for dei som sit att heime: Klarar poden å kome seg i seng om kvelden? Opp om morgonen? Får ho i seg mat? Kva kjem ho til å ete – og ikkje minst: Kor mykje kan eg blande meg?

Det siste er nok særs individuelt, styrt av personlege forhold, kan du seie. Men om du no skal flytte ut eller verte fråflytta, vågar eg meg ut på å gje deg fylgjande råd med i bagasjen: Nudlar på boks er ikkje middag. Ikkje lunsj heller. Eller mellommåltid. Til nød kveldskos – som alternativ til chips. Kvifor? Gje meg ein liten augneblink.

Lite av det meste

Denne hausten kjem NorgesGruppens EMV-merke Eldorado med to nye nudelbollar, det vil seie plastboksar med tørre nudlar og krydder som du fyller med vatn og et rett frå boksen. Variantane har dei fengande namna Cheeky Chili, med smak av kimchi, og Tasty Thai, som smakar kylling. I begge høve legg vi vekt på ordet smak: Ingen av produkta inneheld nemleg ein einaste liten flik av produkta dei er laga for å smake som. Det er ikkje ein einaste bit fermentert kål, chili eller ingefær i Cheeky Chili, ikkje så mykje som eit lite kyllingbein i Tasty Thai.

Det er rett og slett temmeleg lite av det meste i Noodle Bowl frå Eldorado – i det minste når det gjeld næringsstoff og råvarer. Ja, Tasty Thai har fått eit strok av tørka paprika og graslauk, men sidan ingrediensane er oppførte under salt i innhaldslista, kan vi nesten ikkje gjere anna enn å håpe at prosentdelen ikkje er så stor. (I innhaldslister står ingrediensen det er mest av, øvst, og det det er minst av, nedst.) Elles er her stort sett tre ingrediensar i boksen: aromastoff, smaksforsterkarar og tilsetjingsstoff.

Ja, og så kveitemjøl og solsikkeolje, då. For berre éin ting er det rikeleg av: kaloriar. Og her kjem funfacten du kan ta med deg på hybel, eventuelt sende med den unge lovande: 100 gram Noodle Bowl inneheld 461 kaloriar, og det er meir eller mindre det same som potetchips. Sørlandschips, til dømes, ligg på 471 kaloriar per 100 gram.

Og chips, det er ikkje middag. Enkelt og greitt.

Årsaka til alle kaloriane er temmeleg enkel: Nudlane er friterte. Det er difor det er så mykje olje i heilt tørre nudlar, og det er difor du kan ete dei utan å tilsetje vatn om du skulle vilje. Dei er til sjuande og sist chips – berre laga på kveitemjøl, ikkje på potet.

Litt næring

Dersom du vil ha enkel og grei middag, og det kan jo skje sånn i startfasen, i alle fall, finst det heldigvis betre alternativ. Toro Rett i koppen har lite eller ingenting med matlaging å gjere, men er dagen slik at det som må til, er å ete frå ein plastkopp, og slike dagar dukkar opp, kor strukturert du enn er, og ikkje minst i startfasar, så er truleg Rett i koppen Potetmos med kjøtt eit betre alternativ. Ikkje berre er kaloritalet seks gongar lågare, men kaloriane i boksen kjem frå råvarer som inneheld næring, som potet, mjølk og kjøt.

Kjøper eg Noodle Bowl frå Eldorado til haustmellommåltidet? Nei takk, eg sparar kos til kosetida og vel meg Toro Rett i koppen til plastboksdagane.  

Siri Helle