Media

Per Anders Todal

peranders@dagogtid.no

Netflix fekk uhorveleg mange nye kundar under pandemien, men no strøymer mange av dei vekk att: For første gong fall talet på kundar frå eitt kvartal til det neste. Sidan årsskiftet er nedgangen på 200.000 abonnentar, dels fordi Netflix trekte seg ut av Russland. Aksjekursen har rasa etterpå, og verdien av selskapet er halvert sidan årsskiftet.

No fryktar det svenske selskapet Spotify, som strøymer musikk og anna lydinnhald, at mistilliten til Netflix skal smitte, skriv Financial Times.

Det er nye tonar. Lenge tykte leiinga i Spotify at det var stas å bli samanlikna med framgangsrike Netflix. Spotify hyra inn den tidlegare finansdirektøren til Netflix, Barry McCarthy, da selskapet skulle børsnoterast, og han har sjølv ofte samanlikna dei to selskapa. Spotify minte han om dei ti første åra i Netflix, har McCarthy sagt.

No seier derimot Spotify-grunnleggjar Daniel Ek at dei to selskapa er totalt ulike. Spotify og Netflix er båe medieselskap som tener dei fleste pengane sine gjennom abonnement, men der stoggar likskapen, meiner Ek.

Han har gode grunnar for å seie det, for aksjekursen til Spotify rasa med 20 prosent da dei dårlege nyhenda frå Netflix kom. Investorane meiner tydelegvis at dei to selskapa faktisk er ganske like. Dei er til og med ganske jamstore i talet på kundar: Spotify har 182 millionar betalande brukarar, medan Netflix har 222 millionar.