Media

Eva Aalberg Undheim

eva@dagogtid.no

Skribent- og ytringsfridomsorganisasjonen PEN America har fått nok av den amerikanske presidentens utfall mot og stempling av media, og levert inn søksmål mot han i ein føderal domstol i New York. Målet er å hindre presidenten i å nytte regjeringsapparatet til å slå attende og truge med represaliar mot journalistar og media for dekning han ikkje likar. Det melder Publishers Weekly.

I eit ope brev skriv PEN-president Jennifer Egan og administrerande direktør Suzanne Nossel at handlingar som å krevje at enkelte journalistar skal verte sparka, og å stemple media som fiendar av det amerikanske folket, har skapt eit miljø av hat mot media «der journalistar har vorte utsette for drapstruslar, trunge livvakter for å dekkje politiske møte og vorte utsette for åtak i eigne redaksjonslokale». Dei viser òg til at presidenten har truga forlag og forfattarar som har publisert kritiske bøker.

– Medan fleire mediehus er nådelause og har robust dekning, vil kanskje enkeltskribentar tenkje seg om to gonger før dei publiserer noko som gjer at dei kjem på kant med Det kvite huset, heiter det i brevet.