Opplagstal

Tiril Rem

tiril@dagogtid.no

Då Mediebedriftene la fram godkjende opplagstal for magasin, aviser og vekeblad onsdag denne veka, fekk Dag og Tid godkjent eit opplag på 13.425 for andre halvår i fjor.

Marknadssjef i Dag og Tid Gregor Falkner takkar lojale abonnentar for opplagsrekordane som vekeavisa har hatt dei siste åra.

– I tillegg til å fornye eigne abonnement snakkar dei godt om avisa og tipsar andre om henne. Det hjelper godt.

Veksten kom først og fremst frå komplettabonnementet, som inkluderer både papiravis og det digitale tilbodet med lydavis, e-avis, arkiv og digitalt kryssord.

– Denne kombinasjonen har vist seg å vere svært populær.

– Kva skal til for å vekse endå meir?

– Først og fremst skal vi halde fram med å lage ei god og viktig avis kvar veke som er verd å abonnere på. Så skal vi ta godt vare på abonnentane våre, det vil seie passe på at papiravisa kjem fram når ho skal, og at det er enkelt å bruke det digitale tilbodet vårt, seier marknadssjefen.

­– Abonnentane våre skal vite at vi set pris på dei, og at dei er grunnen til at vi kan lage ei god avis. Avisa har no så høg kvalitet at ho fortener endå fleire lesarar.