Norges Jeger- og Fiskerforbund (NJFF) er i dag den einaste landsdekkjande interesseorganisasjonen for jegerar og sportsfiskarar i Noreg, med kring 111.000 medlemer og nærare 600 lokallag. Medlemsbladet Meddelelser kom ut fyrste gong året etter stiftinga i 1871. Her utveksla medlemene jaktrøynsler, og det blei opplyst om utviklinga i viltbestandane og i lovgjevinga. I tillegg var der meldingar om jakttilhøva i andre land. Dei gamle årgangane er difor viktige dokument i norsk jaktsoge.

I dag heiter bladet Jakt & Fiske og er det eldste og største norske fagtidsskriftet i sitt slag, med eit opplag på mest 90.000 i månaden. Meddelelser var derimot eit reint informasjonsorgan for ein eksklusiv herreklubb i Kristiania, fortel dagens redaktør Ole Kirkemo.

– Det var ikkje mykje journalistikk i det, det var meir meldingar av typen «meddelelser fra styret». Ikkje før etter andre verdskrigen, då NJFF gjekk frå å vera ein eliteklubb til å bli ein breiddeorganisasjon, blei bladet til noko me oppfattar som eit tidsskrift.