Trygve Skaug, heiter Noregs bestseljande poet i dag. På lista over dei femten bestseljande poesibøkene i Noreg tronar Skaug med to diktbøker. Skaug er artist, men han er òg kjend som ein av dei nye «Instagram-poetane», med over 200.000 fylgjarar på Instagram. Det er fyrste gong på tretti år at diktarar atter er på salstoppen i norske forlag.

Instagram-poetane var fyrst haldne utanfor det gode selskapet. Diktet attmed er frå 11 millioner Bugg (2013), med Fashion Moves Litterature som utgjevar. Men no kjem Instagram-poetar ut på store forlag – men enno utan å bli kjøpte inn av innkjøpsordninga. Det er heller ikkje rart. Kritikarar og eldre lyrikarar kallar dette ikkje-poesi og Skaug «litteraturens Samantha Fox».

Men sjølvsagt er dette poesi. Problemet i Noreg, særleg kring tusenårsskiftet, er at lyrikk vart definert for strengt. Berre den akademiske, språkkritiske poesien var poesi. Heldigvis har det skjedd ei opning av feltet. Somme kritikarar har òg peika på at denne typen lyrikk alltid har eksistert, nemleg i epigrammet, kortdiktet.

Eg vil samtidig peike på ein annan sjanger, brukslyrikken, særleg slik han kjem fram hjå Arnulf Øverland, som kjem høgst når Noregs mest populære diktar skal kårast. Eit av Øverlands mest kjende dikt er «En hustavle» frå 1929. Eg siterer den siste strofa: «Ingen kan resten av tiden/ stå ved en grav og klage/ Døgnet har mange timer/ året har mange dage». Dette diktet kunne like gjerne ha vore frå ei av Skaugs bøker. Øverlands og Skaugs dikt har det sams at dei spelar på daglegdagse uttrykk for å fremja klåre, nyttige og terapeutiske bodskapar: Grip dagen og sjå ljost på livet!

Den religiøse termen «hustavle» er interessant. «(Kort) samling av levereglar for medlemer i ein huslyd», heiter det i nynorskordboka. Før hang hustavlene på veggen som fliser eller dukar med bibelsitat og ordtak. I dag heng dei som magnetar på kjøleskåp, dei står på kaffikoppar eller som visdomsord på Instagram. Nihil sub sole novum est.

Ronny Spaans

Timing

– Er det ikke litt for tidlig

å si at du elsker meg, sa hun

– Er det ikke litt for seint

å be meg om å la være, sa han

Trygve Skaug