Marianne Hurum:

«Maleri og skulptur»

Lillehammer Kunstmuseum

16. februar–2. juni 2019

Utstillinga er laga spesielt for hovudsalen i museet, med måleri og skulpturar i aluminium.

Dette er den hittil største mønstringa av kunstnarskapet til Marianne Hurum. Ho er kjend som ein nyskapande målar, med sterke og vitale former og ein røff og energisk penselbruk. Det største verket i utstillinga er ei frise på heile 23 meter.

Norsk modernisme og bygdenes dekormaling

Lychepaviljongen, Drammens Museum

14. februar–19. mai

Utstillinga syner modernistisk kunst som ei vidareføring av fleire tusen år gamle tradisjonar. Her er folkekunst som rosemåla kister, ølbollar og tutekanner viste saman med arbeid av kunstnarar som Henrik Sørensen, Kai Fjell, Olav Strømme, Knut Rumohr, Jakob Weidemann og Mari Slaatelid.

Espen Dietrichson

Haugar Vestfold Kunstmuseum

19. januar–31. mars

Espen Dietrichson viser trykk og teikningar med fantastiske surrealistiske skildringar av arkitektur som løyser seg opp og svever over aude landskap. Den allsidige kunstnaren syner i tillegg fleire installasjonar med leikne skulpturar i metall.

Eve Ariza: «Murmuri»

Kunsthall 3.14, Bergen

8. februar–7. april

Eve Ariza frå Andorra har bygd opp ein diger installasjon av handlaga former i keramikk. Tusenvis av små skåler eller opne munnar dekker veggane og ulmar mot oss i varme jordfargar som spenner frå det gylne, raudlege til det brunlege. Installasjonen vart vist første gong under Veneziabiennalen 2017 i den andorranske paviljongen.

Beate Einen:

«Lysglimt – en hyllest til en mor»

Sogn og Fjordane Kunstmuseum

23. februar–7. april

Det ser ut til at det ein trend av året å syne digre installasjonar. Beate Einen fyller heile 150 kvadrat og 7 meter takhøgd med kunstglas. Då mor hennar vart alvorleg kreftsjuk i 2011, vart gnisten vekke, og ho la vekk kunsten. Dette er vegen attende til kunstscena. Utstillinga er rik, fargesterk og fabulerande. Installasjonar i munnblåst glas dekker veggar, golv og tak.