Potetkanon

No er det altfor lenge sidan eg har hatt potetkanonen framme. Faktisk kjenner eg ei sitring i heile kroppen når eg ber han opp frå kjellaren. Eg finn nokre gamle skrukkete poteter i ein sekk som det ikkje er mykje om. Men til dette bruket er dei perfekt.

Det viser seg at eg har gløymt ut korleis potetkanonen fungerer, og etter eit par mislykka forsøk byrjar eg å tvile på meg sjølv. Ingenting skjer, ikkje noko smell. Poteta blir verande i røyret.

Eg ser ingen annan utveg enn å ta fram telefonen og ringje og spørje om hjelp.

– Du har no komme til hjelpetelefonen for potetkanonar, seier ei vennleg stemme.

– Trykk 1 for bedrift. Trykk 2 for privat. For English press 5.

Eg trykkjer på 1.

– Takk, seier stemma i den andre enden og held fram:

– Ein potetkanon er som namnet seier, ein kanon til å skyte poteter med. Konstruksjonen er enkel, berre eit tynt røyr som endar i eit litt kortare og tjukkare røyr med eit lite hòl i, som dannar eit kammer der du sprayar inn startgass som blir tend med ein peistennar. Poteta du har stappa ned i det tynne røyret, flyg til himmels om alt klaffar.

– Trykk 1 for å lære om korrekt handtering av potetkanon.

– Trykk 2 om du meiner du er potetkanonproff og vil komme i kontakt med andre potetkanonproffar.

Nok ei gong trykkjer eg på 1.

– Det er for tida stor pågang, ver vennleg og vent, seier stemma.

Eg høyrer noko låg panfløytemusikk. Eg ventar. Det går ei stund og så fadar musikken ned litt.

– Det er for tida stor pågang, ver vennleg og vent, seier stemma på nytt.

Musikken tek seg opp igjen, og eg ventar litt til. Musikken stoppar, og eg høyrer spraking.

– Trykk 1 for tips til å velje riktige poteter til potetkanon.

– Trykk 2 for å lære meir om fordelar og ulemper ved å skyte opp ting ved hjelp av blautt dopapir.

– Gjeld det bygging av eigen potetkanon? Trykk 3.

Men så vert stemma brått alvorleg:

– Me kan dessverre ikkje gjennomføre heimebesøk eller reparasjonar, og minner om at eigne prisar gjeld dersom du ringjer frå utlandet.

No høyrer eg ringjetonen att. Ei ny stemme kjem inn, men denne gongen er det noko irsk folkemusikk bak. Det verkar som ein reklame.

– Jaså du, så du bruker potetkanon med startgass? Følgjer du ikkje med i tida? Alle proffar har for lengst skaffa seg potetkanon med luftkompressor. Sjå heimesida vår, www.potetkanon.no, for meir info. Det held fram å ringje. Så kjem den gamle stemma tilbake.

– Om du vil snakke med ein potetkanonekspert, vent på svar.

Eg ventar. Etter ei lita stund høyrer eg ei kjend stemme. Eg fortel at det er trøbbel. Potetkanonen vil ikkje fungere.

Potetkanonproffen går gjennom dei viktigaste tinga eg må tenkje på, og ber meg vere nøye og ikkje slurve. Han forklarer at i kaldt vêr blir det noko rart med blandinga av startgass og oksygen, då kan det vere litt vanskeleg. Potetkanonproffen har hjelpt mange i same situasjon som meg, han veit kva han held på med. Eg noterer og blir på ny fylt av ei sterk tru.

Han fortel at han er saman med nokon som er over 80 år og nettopp har starta med potetkanon. Eg synest eg høyrer stemmene i bagrunnen som ler og skravlar.

Frank Tønnesen