«Kullsvart og vis»

Slik oppsummerte juryen til Nordisk råd romanen som vann Nordens mest høgthengande litterære pris. Det er den danske forfattaren Kristen Thorup som får prisen i år for boka Erindring om kærligheden. Thorup er ein kjend forfattar i grannelandet vårt: Ho debuterte med diktsamlinga Indeni-Udenfor i 1967, og feirar dermed femti år som forfattar i år. Romanen Erindring om kærligheden portretterer kvinna Tara, som snublar seg gjennom tilværet som einsleg mor og arbeidslaus kunstnar. I fokuset står tilhøvet til dottera Siri, men samtidsspørsmål som klima og innvandring blir òg fletta inn i romanen.

– Luther var ein arrogant idiot

Det er orda til den kjende britiske filmregissøren Peter Greenaway. Som kjent var det i veka som var, 500 år sidan Luther spikra opp dei 95 tesane sine. På basis av teikningar og målarstykke frå 1500- og 1600-talet har Greenaway laga eit personleg filmessay om reformatoren: Arven etter Luther. Her interesserer han seg for medierevolusjonen i Luthers hundreår, prenteverket, som gjorde propaganda i stor skala mogeleg. I intervju med den nederlandske avisa Trouw utdjupar Greenaway kva han meiner: «Luther var ingen tenkjar eller teolog, men ein opportunist», «det er difor eigenleg ingen grunn til å feire karen», seier den kontroversielle filmskaparen.

ronny@dagogtid.no