Kristin Fridtun, som skriv om ord, og Per Egil Hegge, som skriv om det som måtte falla han inn når leveringsfristen er nær, har av sjefredaktøren fått i oppdrag å kåra dei tre dårlegaste, tåpelegaste institusjonsnamna i kongeriket i 2018.

Dei nominerte var:

Equinor (tidlegare Statoil)

Fjord (kommunane Norddal og Stordal på Sunnmøre som skal gå saman)

Vestland, Viken og Innlandet (nye fylke)

OsloMet (tidlegare Høgskolen i Oslo og Akershus)

Generelt vil topersonsjuryen seia at konkurransen her er umåteleg hard, og alle dei nominerte kunne ha fortent pallplass. Men det skal skiljast, og her er konvoluttane opna:

Nummer 3: Equinor

Her har namnemakarane nådd to sublime mål: For det første har dei fått med den heilt unorske bokstaven q. For det andre har dei lukkast med å gøyma bort alle hint om kva selskapet driv med. At dette skulle vera eit norsk firma som finn, raffinerer, produserer og eksporterer energi, vil ingen få mistanke om. I eitt ord: raffinert.

Nummer 2: Fjord

Vi lyt plaga lesarane med litt grammatikk. Kommunenamnet Fjord er eintal av Fjordane, som no går ut or både soga og fylkeslista som del av «Sogn og Fjordane». Men i til liks med vinnaren (som vi gøymer til slutt) er dette eit fellesomgrep, ikkje eit namn, og særnamn enda mindre.

Nummer 1: Innlandet

Øvst på pallen, nr. 1 og trompetfanfare for fylkesnamnet Innlandet. Tatarata!

Innland er det minst like flust av i kongeriket som det er fjordar. Frå 10-kilometersteinen nord for Lindesnes og heilt til Finnmarksvidda og enda litt lenger er det berre skire innlandet. Verkeleg kreativt og med sans for dei lange linene i geografien.

Ein som var like hardt plaga av namnenaud som diktarar kunne vera av rimnaud, var polfararen Otto Sverdrup (1854–1930). Han leidde den andre ferda med «Fram» i åra 1898–1902, og da han skulle namngi fjell, nes, øyar, sund og bukter i isøydemarka i Nord-Canada, treiv han trøndelagskartet og stal som ein ramn. Han redda seg ut av fantasiløysa si ved å forvandla seg til kopist.

Heller ikkje såpass greidde dei i departementa i kongeriket 120 år seinare.

Kva lærer vi av dette? At verda ikkje alltid går framover. Ikkje langsamt eingong.

Hardaste konkurrent: OsloMet. Når det ikkje nådde opp, med den unorske storbokstaven i midten, og som Equinor utan signal om kva institusjonen driv med, er det fordi desse manglane longe er uttværa i debatten.

Kristin Fridtun
og Per Egil Hegge