Mariekyrkjeruinen i Oslo er opna

Ruinen etter Mariakyrkja i Middelalderparken i Oslo er ferdig konservert og vart denne veka opna. Murverket er reparert, og det er sett opp stolpar som syner kvar den fyrste trekyrkja stod. Det er òg avduka ein bronsemodell av kyrkja, slik ho truleg såg ut i år 1300, melder Riksantikvaren.

Det er Riksantikvaren og Oslo kommune som har spleisa på konserveringa av kyrkjeruinane. Mariakyrkja vart bygd fyrste gong rundt 1050, og var i starten av 1300-talet den tredje største i landet. Kyrkja brann ned i 1523 og vart riven ned i 1542. Ruinane etter kyrkja kom fyrst til syne att fleire hundre år seinare, ifølgje Riksantikvaren.

George Orwell på Unesco-liste

Den engelske forfattaren Eric Arthur Blair, kjend under pseudonymet George Orwell, skal ikkje ha teke vare på mange personlege papir eller manuskript. No er det som var att i arkivet etter han, teke inn som del av verdas dokumentarv, i Unesco-registeret Memory of the World, melder The Guardian.

Registeret skal verne om og gjere unike historiske dokument tilgjengelege. Frå før inneheld registeret dokument som Anne Franks dagbok, Magna Carta, Et dukkehjem av Henrik Ibsen og De Castbergske barnelover. Ei notatbok frå 1943 med skisse til dystopien 1984 og arbeidsnotat og dagboknotat frå då Orwell skreiv The Road to Wigan Pier, reportasjen om arbeidsforholda i industristrøka i Nord-England, er blant dokumenta i arkivet.

Svensk sjef ved Den Nationale Scene

Den svenske regissøren og skodespelaren Stefan Larsson er tilsett som ny teatersjef ved Den Nationale Scene i Bergen, ifølgje nettsida bok356.no. Larson har jobba som skodespelar sidan 1983. Han har tidlegare vore teatersjef for Betty Nansen Teateret i København og Aarhus Teater og kunstnarisk leiar ved Dramaten i Stockholm. I fjor sette han òg opp Shakespeares Hamlet for Den Nationale Scene i Bergen. Larson tek over som teatersjef etter Agnete Haaland 1. januar 2020.

Kritikarprisutdeling

Kritikerlaget, seksjon for teater, musikk og dans, delte torsdag ut kritikarprisane for 2017/2018. I kategorien dans gjekk prisen til Marie Bergby Handelad for Forfatterbevegelsen, Gisle Kverdokk og Bjørn F. Rørvik fekk musikkprisen for Purriot og den forsvunne bronsehesten. Teaterprisen gjekk til Johannes Holmen Dahl for Glassmenasjeriet.

eva@dagogtid.no