Kulturkommentar
Darren Aronofsky trur KI kan skape god film. Dessverre er Time Magazine einig.
Benjamin Franklin i On This Day... 1776
Skjermbilete frå traileren til filmen
I år er det 250 år sidan dei
tretten britiske koloniane i Nord-Amerika vedtok sjølvstendefråsegna og braut
med det britiske imperiet. I høve jubileet har Time Magazine fått den
Oscar-nominerte regissøren Darren Aronofsky til å dramatisere hendingane i eit
kort filmformat dei har kalla On This Day… 1776.
Aronofskys røynsle med
historiske drama er avgrensa til ein film om Noah, han med arken. Der tøygde han ein del grenser. Når han no skal lage korte YouTube-forteljingar om vegen til nordamerikansk sjølvstende, tøyer han fleire. Han nyttar ikkje skodespelarar, kamerafolk eller kostymedesignarar. Serien er i det store og heile
laga med ein Google-KI.
Det er ein pinleg idé sjølv om
ein heiter Coca-Cola og skal late som om
kolsyrehaldig leskedrikk har noko som helst med feiring av jul å gjere. Når
ein er Time Magazine og i over 100 år har sett internasjonal dagsorden, burde
ein tenkje på om det verkeleg er skulefjernsyn som skal vere pioneren for ei
KI-generert filmrøynd.
For å ta det positive: Dei to
filmane som er ute, syner ganske greitt korleis George Washington, Benjamin
Franklin og Thomas Paine gjorde sitt for amerikansk sjølvstende. Den
KI-genererte Franklin er ikkje heilt ulik måleria av den pragmatiske
statsmannen, om ein myser eller tek av seg brillene. Episodane er ganske korte.
Utfordringa er at dei er mildt
sagt ubehagelege å sjå på. Andleta er uhyggjelege, nesten-ekte, rørslene lite
menneskelege. Klippa er repetitive. Nokre scener ser ut til å vere inspirerte av, altså
direkte KI-kopierte frå Stanley Kubrick-filmen Barry Lyndon.
Aronofsky nyttar KI som eit
narrativt verktøy, men ignorerer at forteljinga, ikkje teknologien, må stå i
sentrum for ei godt fortald historie.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
