Billy-skapar Mort Walker er død TeikneserieNora Rydne nora@dagogtid.noDen kjende og kjære teikneserieskaparen Mort Walker gjekk bort laurdag 27. januar. Han var 94 år og døydde av alderdom heime i Stamford i Connecticut.
Mort Walker på vitjing hos garden i Oslo i 2000.
Foto: Lise Åserud / NTB Scanpix
Den kjende og kjære teikneserieskaparen Mort Walker gjekk bort laurdag 27. januar. Han var 94 år og døydde av alderdom heime i Stamford i Connecticut.
Serien om den late soldaten Billy, Beetle Bailey på originalspråket, starta opp i 1950. Sidan då skal Billy og resten av figurane i «Sumpleiren» ha nådd 200 millionar lesarar. På sitt mest populære blei serien trykt i 1800 aviser. I Noreg blei han først trykt i Vi Menn i 1955, før soldaten fekk sitt eige blad i 1971. Bladet vert framleis gitt ut av Egmont.
Walker baserte serien på eiga erfaring i den amerikanske hæren under andre verdskrigen.
– Eg var meinig, korporal, sersjant og løytnant, og eg var ein tabbemakar i kvar rang, skreiv Walker i samleutgåva The Best of Beetle Bailey som kom ut i 1984.
I 50-årsjubileet til serien i 2000 blei Walker heidra av både amerikanske og norske militære. Han fekk pris for arbeidet og militærtenesta av det amerikanske forsvarsdepartementet. På noregsbesøket sitt same året vart han utnemnd til æresgardist då han vitja Garden i Oslo.
Walker vert no hylla av serieskaparar verda rundt. På nettsida si skriv den amerikanske teikneserieskaparen Mark Evanier at Walker var ei glede å vere saman med, og at han alltid var villig til å teikne seriekarakterane sine til fansen når han møtte dei.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.