Musikk
Arkivert: Det lukkelege orgelet til Dave «Baby» Cortez
David Cortez Clowney som popstjerne i 1960.
Hausten 1958 var 20 år gamle Dave «Baby» Cortez i eit New York-studio for å synge til eit instrumentalspor han sjølv hadde spelt inn. Han spurde om han kunne erstatte røysta si med ein solo på hammondorgelet som stod i studio. Songen heitte «Happy Organ», og sjeldan har ein instrumentaltittel vore meir dekkande.
Viltveksande pianoakkordar, sirkusliknande damporgeltonar iblanda råe gitarriff blei ein uimotståeleg virvelkarusell. Plata gjekk til topps på Billboard si nystarta Hot 100-liste i mai 1959, og i 1962 var Cortez tilbake på 10. plass med «Rinky Dink». Han heldt det gåande på 60-talet med funky souljazz. Men frå 1973 blei det tyst frå Cortez, med unnatak av då Miriam Linna spelte han inn i 2011 på Norton Records. Så blei han borte for godt.
I juli i år fortalde Linna til Billboard at Dave «Baby» Cortez ifølge offentlege register døydde 31. mai 2022 i heimen sin i Bronx, og at han blei gravlagd i Plot 434 på Hart Island, fattigkyrkjegarden på Bronx-kysten, der ein million andre ligg i umerkte graver.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
