Fengslinga av Asli Erdogan skaper solidaritetskampanjar for Tyrkia
Den prislønte forfattaren og menneskerettskjemparen Asli Erdogan blir møtt med underskriftskampanjar, solidarisk vakthald ved fengselet og kronikkserie etter at ho vart tiltalt og fengsla førre veke.
ASLI ERDOGAN FOTOGRAF MUHSIN AKGUN RADIKAL
MUHSIN AKGUN
Gunvald Axner Ims
Det vekte stor merksemd både i og utanfor Tyrkia då Asli Erdogan vart arrestert førre veke. I Noreg er tre av bøkene hennar omsette og utgjevne av Gyldendal: Byen med den røde kappa, Den mirakuløse mandarin og Steinbygningen. Erdogan har besøkt Litteraturfestivalen i Stavanger, var hovudtalar under Undset-dagane i 2011 og mottok i 2013 den aller første Ord i grenseland-prisen for «sine stilsikre, magiske og prosapoetiske skildringar av kvinneleg røynsle og sitt ukuelege moralske engasjement trass truslar og vald». Fengslar redaktørar
Erdogan vart tiltalt og fengsla etter mistanke om medlemskap i væpna terrororganisasjon. Tiltalen bygde ifølgje advokaten hennar særleg på fire tekstar om folk i krigssoner i Søraust-Tyrkia, to av desse har blitt publiserte i Klassekampen tidlegare i år. Arrestasjonen hadde også bakgrunn i engasjementet Erdogan har vist for avisa Özgür Gündem («Fri dagsorden») som i ein dom førre tysdag vart dømd til å stengje inntil vidare.
Dei faste Özgür Gündem-redaktørane Zana Kaya og Inan Kizilkaya er også fengsla og tiltalte for det same som Erdogan. Sentrale medium på venstresida, inkludert Cumhuriyet («Republikken») gjekk straks ut mot stenginga av Özgür Gündem, som sidan oppstarten i 1992 har vore den mest ihuga redaksjonen når det gjeld å dekkje overgrep mot kurdarane trass forfølging. Erdogan har skrive for avisa sidan 2011 og har i år vore med i ein solidaritetsaksjon der ho og andre har gått inn som redaktørar når dei faste redaktørane har blitt fengsla.
Held «fridomsvakt»
Norsk PEN, Nff og NO krev at Erdogan må setjast fri straks. PEN har per 22. august registrert 97 forfattarar og journalistar som sit fengsla i Tyrkia. I Istanbul held forfattarar, fagorganisasjonar, journalistlag og andre venner «fridomsvakt» for Erdogan, Kaya og Kizilkaya utanfor murane, og det er starta ein kampanje der ein ny forfattar kvar dag skriv kronikk for Erdogans frigjering.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
