Kva opphaldsplass?

5 POENG: Den sveitsiske presten Walter Bion vert kalla far til denne typen opphaldsplass. Han starta den første i 1876. Dei første i Noreg stod klare utanfor Tønsberg sommaren 1898.

4 POENG: Stikkordet sommaren er relevant. Dei utanfor Tønsberg heitte Karlsvika 1 og Karlsvika 2. Ordet er på elleve bokstavar.

3 POENG: Med auka velstand utover 1900-talet har dei fleste vorte historie. Lillebjørn Nilsen song om ein slik.

2 POENG: Tanken var å samle barn, gjerne frå byen, til eit sunt opphald på landet. Ikkje heilt ulikt leirskulen i dag.

1 POENG: «Husker du den gangen da vi gikk på folkeskolen,/ da sommer’n det var …».

Kva person?

5 POENG: Denne personen var djupt interessert i litteratur. Folk la tidleg merke til talegåvene. Personen vart fødd i dagens Belarus i 1923 – den gongen Polen – og snakka polsk, fransk, engelsk, russisk, jiddisk og eit språk til.

4 POENG: Det siste språket er hebraisk. I den 70 år lange politiske karrieren var personen med i tolv regjeringar og fem ulike parti.

3 POENG: Han vart både statsminister og president i Israel. Han døydde i 2016.

2 POENG: Som utanriksminister bidrog han til Oslo-avtalen i 1993. Då fekk han Nobels fredspris saman med Yitzhak Rabin og Yasir Arafat.

1 POENG: Det polske fødenamnet er Szymon Perski.

Kva by?

5 POENG: Som turist i denne byen vil du vonleg sjå katedralen, strandavenyen Malecón og gamlebyen. Sistnemnde er verdsarvstad. Du landa truleg på José Martí internasjonale lufthamn.

4 POENG: Byen ligg på nordkysten. Han vart grunnlagd av conquistadoren Diego Velázquez de Cuéllar tidleg på 1500-talet.

3 POENG: Han er det politiske, økonomiske og kulturelle senteret i ein øystat. Kanskje syng du på Evert Taube, Kjartan Lauritzen eller Camila Cabello.

2 POENG: Sukkerrøyr, tobakk og frukt er viktige eksportvarer. Nokre andre store karibiske byar er Santo Domingo, Port-au-Prince, San Juan og Kingston.

1 POENG: Han er hovudstaden på det som lenge vart kalla Castros øy.

Kva TV-program?

5 POENG: Då Kjell Magne Bondevik deltok her, rekna programleiaren med at statsministeren ville «la gass være gass og gi full gass». Kort tid etter gjekk han av i gasskraftsaka.

4 POENG: Programmet hadde over ein million sjåarar på det meste. Jon-Willy Rydningen var kapellmeister. Den første episoden var med Nils Arne Eggen og Frode Kyvåg.

3 POENG: NRK-suksessen gjekk frå 2000 til 2009. Namnet er tre ord.

2 POENG: Underhaldningsprogrammet vart leia av Dan Børge Akerø.

1 POENG: Konseptet er at to kjendisar konkurrerer og får eit gjensyn med folk dei gjekk på skule med.

Svar på hinta

Kva opphaldsplass: Feriekoloni (Songen er «Stilleste gutt på sovesal 1».)

Kva person: Shimon Peres

Kva by: Havanna (Songreferansane var «Flickan i Havanna», «Havanna» og «Havana».)

Kva TV-program: Den store klassefesten