Kva norsk slekt?

5 POENG: Denne slekta kom til Noreg på 1600-talet. Namnet er etter ein landsby i Sønderjylland i Danmark. Greinene går ut frå tre brør fødde i 1770-åra. Over ti av medlemmane har eigen artikkel i Store norske leksikon.

4 POENG: Dei tre brørne var Georg, Jacob og Ulrik. Jacob var far til den mest kjende medlemmen (1816–1892). Ulrik var oldefar til polarforskaren.

3 POENG: Polarforskaren var Otto. Utover 1900-talet har me til dømes teologen Edvard, genetikaren Aslaug og lyrikaren Harald.

2 POENG: Den mest kjende medlemmen vart statsminister.

1 POENG: Statsminister Johan vert kalla parlamentarismens far.

Kva gjenstand?

5 POENG: Denne gjenstanden er spesielle individ hos fleire artar i slekta Trifolium. Symbolikken er felles for mange land, Noreg inkludert. Gjenstanden deler namn med eit norsk produkt frå 1926 med hovudsakleg blå emballasje.

4 POENG: Han er ein plante. Vanlege individ er nasjonalsymbol i Irland, då kalla shamrock.

3 POENG: Han er i logoen til både 4H, Senterpartiet og fleire søsterparti.

2 POENG: Det norske produktet er ein Freia-sjokolade. Fetter Anton er stadig å sjå med gjenstanden.

1 POENG: Symbolikken er å bringe lukke. Arten kan vere til dømes kvitkløver.

Kva organisasjon?

5 POENG: Denne norske organisasjonen har ein forløpar stifta i 1946. Han fører ein spesiell rekneskap, og i fjor var talet rekordstort: 117 millionar. Organisasjonen har òg den sivile styrken NORCAP, med om lag tusen ekspertar.

4 POENG: Han har hatt TV-aksjonen flest gonger, nemleg fem, sist i 2010. Arbeidet er retta mot ein type menneske som det var 117 millionar av i fjor.

3 POENG: I logoen ser me bokstavane NRC i kvit skrift på oransje botn. Generalsekretær er Jan Egeland.

2 POENG: Forløparen var Europahjelpen. Deretter var namnet Det Norske Flyktningeråd, så Flyktningerådet, så det noverande.

1 POENG: Båe ledda er å finne i dei tre gamle namna.

Kva fiktiv figur?

5 POENG: Dette er tittelfiguren i ein roman frå 1883. Den første norske omsetjinga var ved Margrethe Munthe (1921). Den mest kjende songen knytt til figuren vart framført av Cliff Edwards.

4 POENG: Romanforfattaren er italienske Carlo Collodi. Det har vore mange filmatiseringar.

3 POENG: Songen er «When You Wish upon a Star» frå Disney-filmen (1940). I 2022 vart treskjeraren Geppetto spelt av Tom Hanks.

2 POENG: Geppetto lagar figuren, ei tredokke som ynskjer å verte ein ekte gut.

1 POENG: Det er mykje å lære for figuren. Når han lyg, vert nasen lang.

Svar på hinta:

Kva norsk slekt: Sverdrup

Kva gjenstand: Firkløver

Kva organisasjon: Flyktninghjelpen

Kva fiktiv figur: Pinocchio