Kva bygning?

5 POENG: Heinrich Ernst Schirmer teikna fleire kjende Oslo-bygningar, deriblant denne. Byggjeåra er 1844–51. Det skulle vere sju slike i Noreg, men det vart berre éin, av økonomiske grunnar.

4 POENG: Etter nedlegginga i 1970 vart han modernisert, gjenopna og lagd ned for godt i 2017. No funderer ein på vegen vidare.

3 POENG: Han ligg på Grønland og har ringmur. Alleen bort til hovudinngangen er oppkalla etter ein fiktiv person.

2 POENG: Førsteleddet i namnet handlar om å få dei innsette til å angre.

1 POENG: Egon kjem stadig ut herifrå i Olsenbanden-filmane.

Kva gjenstand?

5 POENG: Denne gjenstanden vart patentert i 1908 av ein tyskar. Ein sentral eigenskap er å vere permeabel. Det finst mange alternative bruksområde, til dømes skopussing.

4 POENG: Han kjem i pakker på til dømes 100 eller 200 stykke. Tyskaren var husmora Melitta Bentz, som grunnla selskapet Melitta.

3 POENG: Han finst i mangt eit kjøkkenskap. Dei ubleikte er brune, dei bleikte er kvite.

2 POENG: Gruten treng ikkje gå i matavfallet. Blomsterbedet og kompostbingen høver vel så godt.

1 POENG: Han er ofte laga av papir. Maskina kan vere til dømes ein Moccamaster.

Fem artar – kva dyreorden?

5 POENG: Denne ordenen har cirka 400 artar, mellom anna blåpanneamazonen i Sør-Amerika. Denne er grøn, men har eit særeige gult andlet med blå panne.

4 POENG: På Sørøya på New Zealand lever arten kea. Han er stor, kompakt og nysgjerrig på det meste som verkar etande.

3 POENG: Den lengste arten – og vonleg mest iaugefallande – heiter hyasintara. Han er knallblå med gul flekk både på kinna og rundt auga.

2 POENG: Den arten som er best til å etterlikne til dømes menneskespråk, er truleg jako. Han er grå og kjem frå det sentrale Afrika.

1 POENG: Undulaten høyrer til parakittfamilien i denne fugleordenen.

Kva person?

5 POENG: Denne personen budde mest i Tyskland, tre lange tidsrom i høvesvis Düsseldorf, Karlsruhe og Berlin. Det vart nokre år i Wales òg. Personen var oldeforelder til Ivo Caprino.

4 POENG: Han (1825–1903) var professor i dei tre tyske byane. Nokre kjende elevar er sonen Nils, Otto Sinding og Kitty Kielland.

3 POENG: Høgfjellet vart tidleg eit typisk motiv. Eit døme er Høyfjell (1857). Seinare kom kysten i fokus, til dømes Innseilingen til Christiania (1874).

2 POENG: Det mest kjente verket er nasjonalromantisk. Han stod for landskapet, ikkje menneska.

1 POENG: Makkeren Adolph Tidemand er òg ein av Noregs viktigaste målarar.

Svar på hint for hint:

Kva bygning: Botsfengselet (Også kjent som «Botsen». Alleen heiter Egon Olsens allé.)

Kva gjenstand: Kaffifilter

Fem artar – kva dyreorden: Papegøyefuglar (eller papegøyar, om du vil)

Kva person: Hans Gude