Hint for hint veke 22

5 POENG: Dette omgrepet er frå Johannes’ openberring 21,21. Verset nemner ikkje omgrepet direkte, berre dei to ledda ordet er sett saman av. Ifølgje verset er det tolv stykke av svaret.

4 POENG: Ordet er derimot nemnt i refrenget i salmen «Som en herlig guddomskilde». Det er ein type vakker konstruksjon.

3 POENG: At St. Peter vaktar ein slik, har me derimot frå populærkulturen. Til dømes vaknar Marve Fleksnes opp ved ein slik og vil gjerne komme gjennom.

2 POENG: Det nemnde kapittelet skildrar den nye himmelen og den nye jorda. Svaret er ein del av muren rundt det nye Jerusalem.

1 POENG: Eit kryssordstikkord kan vere «muslingsteindekorert inngang».

5 POENG: Denne fjellrike kommunen har eit namn som tyder bratt fjellside. Han har eit godt etablert historisk spel, Songen ved det store djup av Rolf Losnegård.

4 POENG: Fiske er ein viktig næringsveg. Kommunen vart til i 2020 ved ei særmerkt samanslåing – dei to delane heng ikkje i hop. Martin Linge fall her under eit raid i 1941.

3 POENG: Dei gamle kommunane, Flora og Vågsøy, er skilde av Bremanger. Rundt ligg Stad, Gloppen, Sunnfjord og Askvoll. Namnet er på fire bokstavar.

2 POENG: Eit ungt bryggjeri som lagar «handverksøl frå Florø», har gjort det godt.

1 POENG: Ordet for bratt fjellside er overført frå ein del av andletet.

5 POENG: På eitt år rakk denne mannen å døy i februar, få tvillingar i september og gje ut sjølvbiografi i oktober, skriven saman med Alex Haley. Boka var med på å gjere han til kultfigur.

4 POENG: Han vart drepen som 39-åring i 1965. Året før konverterte han til ortodoks sunniislam og tok namnet El-Hajj Malik El-Shabazz.

3 POENG: Amerikanaren hadde tidlegare vore frontfigur for Nations of Islam. Han inspirerte Black Power-rørsla og meinte Martin Luther King jr. ikkje gjekk langt nok.

2 POENG: Han skifta etternamn til éin bokstav, som symbol for slavar utan identitet. Denzel Washington har spelt han på film.

1 POENG: Han vart fødd Malcolm Little.