Telemann på dansk

Medan Brockespasjonen byrjar med ei åtte minuttar lang instrumentalinnleiing, går Telemann i oratoriet Die Auferstehung (1761) rett på sak, med eit vedunderleg vemodig sopranresitativ over enkle, effektfulle strykarakkordar. Fyrste gong eg høyrde oratoriet, var eg overtydd om at eg hadde sett feil CD i spelaren. Dette måtte vel vera Haydn? Eller tidleg Mozart? Nei, det var Telemann, som i ein alder av 80 stagvende stilistisk og laga less is more-musikk som peikar fleire tiår fram i musikkhistoria.

Meir morosamt enn gripande er det andre stykket på albumet, De Danske, Norske og Tydske Undersaaters Glæde (1757). Telemann komponerte denne relativt enkle, danske kantaten i høve åremålsdagen til kong Fredrik V av Danmark og Noreg. Lyttar me nøye etter i librettoen (songteksten), høyrer me at librettisten har teke alle forholdsreglar, for både Odin, Apollon og Gud blir påkalla som vernar av rike og drott.