Yahya Hassan dømd

Den danske poeten Yahya Hassan sa seg i går skuldig i alle dei 42 lovbrota han var tiltalt for, mellom anna vald, truslar, sedskapsbrotsverk, hærverk og køyring i påverka tilstand. Han vart dømd til psykiatrisk behandling på ubestemt tid. Det skriv danske Politiken, som var til stades i retten i Aarhus.

Lovbrota skal ifølgje informasjon Lokalavisen Aarhus har fått innsyn i, vere gjorde mellom 2015 og 2018, og Hassan har sete varetektsfengsla på psykiatrisk avdeling i Aarhus sidan 16. juli i år.

Hassan debuterte i 2013 med diktsamlinga Yahya Hassan, som handla om ein oppvekst med vald, svik og kriminalitet. Diktsamlinga vart raskt ein bestseljar, med eit opplag på meir enn 120.000.

Hassan er tidlegare dømd til fengsel for å ha avfyrt skot og råka ein 17-åring i foten.

Trump vil ut av postsamarbeid

Det kvite hus har denne veka varsla at USA kan vilje trekkje seg ut av Verdspostforeininga (UPU), ein særorganisasjon innan FN, danna for å utvikle posttenester mellom land. Ifølgje Politiken inneber avgjerda at USA går frå ein traktat som sikrar lågare gebyr for utanlandske posttenester for levering til kundar i USA. Det kvite hus meiner Verdspostforeininga og traktaten har ført til at utanlandske posttenester har utkonkurrert amerikanske selskap. Som døme skal små pakkar frå Kina vere mellom 40 og 70 prosent billigare å sende gjennom UPUs avtalar enn om dei skulle sendast internt i USA.

Kugalskap oppdaga i Skottland

Den skotske regjeringa har opplyst at det er registrert kugalskap på ein gard nær byen Aberdeen. Det melder BBC.

Sjukdomen vart oppdaga gjennom rutinemessige testar etter at ei ku på garden døydde. Det er innført karantenesone rundt garden og vert no gjort fleire testar for å finne ut kvar smitten kjem frå.

Den døyelege sjukdomen går til åtak på hjernen hjå storfe og medfører endra åtferd og gradvis tap av koordinasjonsevne hjå dyret. Det er fyrste gong på ti år at det vert påvist kugalskap i Skottland.

eva@dagogtid.no