– Vi må ta til etterretning at det er eit ønske i Fiskarlaget Nord om å gå ut av Fiskarlaget, og vi vil ha ein god og konstruktiv prosess, seier Otto Gregussen, generalsekretær i Norges Fiskarlag.

Han kjem rett frå landsstyremøte i Trondheim, der utmeldingsvedtaket i Fiskarlaget Nord naturleg nok stod på dagsordenen. Landsstyret erkjenner at det er «behov for endringer i organisasjonen Fiskarlag», heitte det i fråsegna frå møtet.

– Skjøner du frustrasjonen i Fiskarlaget Nord over lina Norges Fiskarlag har ført?

– Det kan eg ikkje kommentere. Alle standpunkt i Norges Fiskarlag er resultat av omforeinte demokratiske prosessar. Om nokon ikkje likar resultatet, må vi berre ta det til etterretning.

– Om Fiskarlaget Nord går ut, er det alvorleg for Norges Fiskarlag?

– Eg kan ikkje seie anna enn at det er alvorleg. Det er veldig trist om nokre av medlemene føler at interessene deira ikkje er godt nok varetekne i Fiskarlaget.

– Med så ulike interesser som dei små kystfiskarane og dei store reiarlaga har – er det mogleg for ei foreining å representere dei alle?

– Fiskarlaget har jo praktisert det sidan 1926, så eg meiner det er mogleg. Det er openbert at liten og stor ikkje alltid har same interesser. Men norske fiskarar har likevel hatt interesse av å ha ei samlande foreining.

– Som den store foreininga for fiskarane har Fiskarlaget hatt makt. De har hatt stor påverknad på fiskeripolitikken?

– Ja. Men makta har òg ein tvilling som heiter ansvar. Og vi har lukkast med å endre næringa frå å vere eit stort subsidiesluk på 1990-talet til ei lønsam næring i dag. Også i ressursforvaltinga er fiskeria ei suksesshistorie. Fangstkapasiteten er no berekraftig sett i høve til ressursgrunnlaget.

– Dei store båtane i kystflåten har no ein effektivitet som ikkje står særleg attende for den havgåande flåten. Har utviklinga gått for langt?

– Det er ingen tvil om at utviklinga i kystflåten har gjeve fleire ganske store båtar, og det er eit resultat av politiske vedtak. Staten ville ikkje betale for å kjøpe ut båtar frå næringa. I staden har fiskarane fått samle kvotar på færre fartøy. Resultatet blir da at kvotane hamnar på færre hender.

– Om Fiskarlaget Nord går ut, kva gjer det med legitimiteten til Norges Fiskarlag som talerøyr for norske fiskarar?

– Fiskarlaget har som mål å samle alle fiskarar i ein organisasjon. Om nokon går ut, svekkjer det Fiskarlaget.

–?Og om kystfiskarane i Troms og Finnmark går ut, blir dei store reiarane meir dominerande i laget?

– Det vil framleis vere både små og store båtar med i Fiskarlaget. Vi skal prøve å vareta interessene til alle.

– Kor mange medlemer har de eigentleg?

– Fiskarlaget har både personar og reiarlag som medlemer. Vi har kring 2000 reiarlag og 4400 personar som medlemer.

– Om kring 20 prosent av medlemene går ut, er det ei dramatisk avskaling?

–?Tala spelar inga rolle. Når nokon forsvinn ut av Fiskarlaget, er det uansett trist og beklageleg.

– Kor mange av dei 4400 personmedlemene dykkar er betalande medlemer, og kor mange er aktive fiskarar?

– Talet inkluderer både fullt betalande medlemer, pensjonistar, uføre og studentar. Vi følgjer ikkje med på kor kvar medlem er. Vi er ein organisasjon for alle fiskarar uansett, seier Otto Gregussen.