Leif Rune Skymoen er styremedlem i bransjeforeininga Legemiddelindustrien og dagleg leiar hjå den norskeigde legemiddelprodusenten Curida, som produserer flytande legemiddel som nasespray, bedøvingsmiddel og sårbehandlingsmiddel.

Han er overtydd om at legemiddelprodusentane som er i Noreg i dag, kan bidra til å hindre mangelsituasjonane vi ser. Men han seier det føreset at norske styresmakter vil nytte seg av produksjonskapasiteten i Noreg, og set seg ned med bransjen og inngår avtalar.

– Det har dei så langt ikkje sett grunn til å gjere. Dei har vel tenkt at dei får det dei treng ved å importere. Det har jo òg fungert greitt tidlegare, men alle mangelsituasjonane no syner at det ikkje lenger gjev trygge leveransar til befolkninga i Noreg, seier han.

– Kor mykje meir kan legemiddelselskap i Noreg produsere, slik du ser det?

– Det er mykje, og det er skalerbart òg. Vi har høve til å lage dei fleste typar legemiddel her, så det handlar berre om at det må lagast avtalar som gjer produsentane i stand til å dekkje behovet, seier Skymoen.

– De òg er vel avhengige av å importere råvarene?

– Det finst selskap som produserer råvarer i Noreg, så det går an å sjå føre seg at vi kan styrkje den produksjonen. Curida har i tillegg føreslege at det må byggjast opp nasjonale lager av råvarer til kritiske medisinar. Det er òg økonomisk gunstigare enn å byggje lager av ferdigprodukt, seier han.

BI-professor og forskar på legemiddelmarknaden Dag Morten Dalen meiner òg det er realistisk å få til større eigenproduksjon.

– Særleg på områda der vi har forsyningsproblem fordi marknaden er for liten og for lite lønsam, kan svaret vere å leggje meir til rette for eigen produksjon. Produksjon av antibiotika er eit døme. Det er ein del antibiotikalegemiddel som framleis er mykje brukte i den nordiske marknaden, men som er lite brukte internasjonalt. Dei er det dermed ikkje så interessant å produsere for dei store selskapa, så her kan det gje god meining å leggje til rette for meir produksjon i Noreg eller i det minste i Skandinavia, seier han.