Per Anders Todal

peranders@dagogtid.no

Medan fleire av dei mest populære cruisehamnene i Noreg no vil avgrense talet på anløp, gjer andre hamner det dei kan for å lokke til seg fleire skip. Kristiansund og Nordmøre Havn er ei av desse. I fjor var det 20 anløp frå cruiseskip i Kristiansund, medan Ålesund hadde heile 165.

«Vi har bestemt oss for å prøve å øke antallet cruisebåter, for det er veldig fint for byen sin del», sa hamnesjef Arnt Honstad i Kristiansund til Tidens Krav i fjor, og omtalte dette som eit satsingsområde. I intervjuet etterlyste han mellom anna eit museum som kunne gjere byen meir attraktiv for cruiseturistar, og såg òg for seg å utvide cruiseturismen til andre nordmørshamner enn Kristiansund: «Vi har sondert terrenget, og lokalbefolkningen i Surnadal, de sier at kommer det cruiseskip – da blir det fest», sa Honstad.

Frysningar

Kristiansund og Nordmøre Havn har oppretta ei eiga stilling for å arbeide med cruiseturismen i Kristiansund, og dei har laga ein eigen cruisemanual for å marknadsføre byen overfor reiarlaga. Kristiansund skal mellom anna lokke cruiseturistar med tilbod som havrafting og sightseeing med småfly eller helikopter.

Synnøve Henden frå Visit Nordvest, eit organ for å styrke reiselivsnæringa i regionen, uttrykte framtidsvisjonane for cruisetrafikken til Kristiansund slik i Tidens Krav i vår: «Jeg har en drøm – og, ja, dette er en overambisiøs drøm – men i nær framtid ser jeg for meg tre cruiseskip klappet til kai under Operafestukene. Jeg får frysninger bare jeg tenker på det.»

Vise fram byen

Når Dag og Tid ringer til hamnesjef Arnt Honstad i Kristiansund og Nordmøre Havn for å snakke om cruiseambisjonane, er han noko meir avmålt.

– Vi har tenkt på å få litt fleire cruiseskip. Ikkje så mange, men nokre ekstra vil vere fint.

– Kvifor ønskjer de fleire cruiseanløp i hamna?

– Det er eit samfunnsargument i dette, det er flott å få vise fram byen vår og området rundt. Og om sommaren er det mindre aktivitet i offshore og fiskeri.

Hovudmålet med å auke cruisetrafikken er ikkje å få større inntekter til hamneselskapet, seier Honstad.

– Dette er ikkje big business. Om vi tek oss av vakthald og fortøying, får vi kanskje eit overskot på tjue eller tretti tusen kroner på eit anløp. I dei større hamnene, som Trondheim, Oslo eller Kristiansand, tener hamneselskapa grovt. Men det er bra å få nokre ekstra turistar hit.

– Er det ikkje eit paradoks at Noreg har som mål å redusere klimagassutsleppa, samtidig som norske hamneselskap arbeider for å få fleire cruiseanløp?

– Vi har landstraumanlegg ved kaiene som dei mindre cruiseskipa kan nytte, og har vurdert å bygge ut landstraum for større skip. Men det kostar mange millionar. Og dei største båtane kjem ikkje til oss, seier Honstad.

Ikkje gammalt rask

– Mange cruisehamner i verda krev at skipa nyttar landstraum ved kai. Vi kan få eit kappløp mot botnen der nokre hamner tek imot skip som andre ikkje vil ha?

– Vi vil ikkje ha dei skipa som ureinar mest. Dei får ikkje kome hit med noko gammalt rask. Dei som kjem hit, er blant dei nyaste og minste cruiseskipa.

– Har de sagt nei til noko cruiseskip fordi det ureina for mykje?

– Eg trur ikkje vi har fått nokon slike gamle skip hit. Og Kristiansund ligg heilt uti havet, så eksosen er ikkje eit så stort problem her. Men det er jo ureining.

– Likar folk cruiseskipa i Kristiansund?

– Ja, fordi dei er så få. I Ålesund kan det vere tre skip til kai samstundes, og da er det så mykje folk i byen at ein ikkje kjem seg fram, seier Arnt Honstad.