Eva Aalberg Undheim

eva@dagogtid.no

Så braut firepartiregjeringa saman før det hadde gått eitt år. Tidlegare Frp-nestleiar og statsråd Per Sandberg meiner Frps regjeringsexit har lege i korta heilt sidan KrF gjekk inn i regjeringa.

– Eg åtvara òg sterkt mot å ta dei inn. Ikkje fordi det var KrF, men fordi det er stor skilnad på ei trepartiregjering og ei firepartiregjering. Når fire parti skal inngå kompromiss og forlik, vert politikken til kvart av partia viska ut, og den som har mest å tape på at primærpolitikken kjem i bakgrunnen, er Frp.

– Kva for primærpolitikk er det som har kome i bakgrunnen det siste året?

– Fiskeri- og næringspolitikken spesielt. Der har alt av utvikling stoppa opp. I det siste statsbudsjettet var det òg lite rørsle i skatte- og avgiftspolitikken og lite ny innsats til infrastruktur. Og moderniseringa og effektiviseringa av offentleg sektor har stoppa opp.

– Likevel har du stilt deg tvilande til om det var rett av Frp å gå ut av regjeringa no?

– Ja, eg ser framleis at dei kunne vorte verande i regjeringa, men prøvd å forhandle med Høgre, KrF og Venstre for å oppnå betre resultat for Frp. Om dei ikkje hadde fått betre resultat, hadde det vore større grunnlag for å gå ut av regjeringa. Men det er framleis eitt budsjett og to reviderte budsjett som skal leggjast fram denne perioden, så handlingsrommet ved å sitje i regjeringa ut perioden var der. No kan i staden mykje fantastisk godt arbeid som Frp har gjort i regjeringa, verte reversert fram mot 2021.

– Så det var altså ikkje heimhentinga av IS-kvinna som var grunnen til at Frp gjekk ut, slik du ser det?

–?Jau, eg trur det var dropen som fekk det til å renne over. Det var jo støy i heile fjor, med bompengar og ein stadig hardare retorikk mellom dei fire partia, utan at partiet gjekk ut. Men det er nok den samla belastinga som ligg i botn.

– Kva er dei viktigaste sigrane til Frp i regjeringa, slik du ser det?

– Det er mange. For det fyrste var det før 2013 ingen som såg det som truleg at Frp kom til å kome i regjering eller å klare jobben i regjeringa. Men gjennom seks år har vi no synt at Frp er eit godt regjeringsalternativ. Så har vi redusert skattar og avgifter, som jo tvert om ville ha gått opp om vi ikkje sat i regjeringa, og det har aldri vorte kanalisert så mykje ressursar og midlar til å byggje moderne infrastruktur i Noreg som med Frp. Truleg har vi òg fått på plass noko av verdas mest restriktive innvandringspolitikk og krav om integrering.

– Det meste av innstrammingane i innvandringspolitikken er vel knytt til grep frå EU?

– Nei. Eller jau, mykje er knytt til Schengen, men Noreg har òg – saman med Danmark, som er endå meir restriktiv enn vi – gjort mange grep som ikkje finst i andre europeiske land. Særleg når det gjeld høve til gjenforeining, krav til opphald og returpolitikken.

– Kva for sigrar er det du fryktar skal verte reverserte no?

– Eg ser ikkje vekk frå at det dannar seg ein konstellasjon i Stortinget som vil liberalisere norsk innvandrings- og integreringspolitikk, og at det vert laga ein koalisjon som flyttar ressursar vekk frå vegbygging og over på kollektivtrafikk.

– Så du trur ikkje Granavolden-plattforma kjem til å verte følgd?

– Det er mange ord i den plattforma, men det er jo òg mykje politikk som ligg utanfor plattforma, og som det går å gjere noko med. Så eg meiner stortingsgruppa til Frp hadde stort handlingsrom også med Granavolden-plattforma.

– Frp har gjort eit byks på målingane dei siste dagane. Kven reknar du med partiet kjem til å ta flest røyster frå?

– Det er ein boost på målingane gjorde rett etter at partiet gjekk ut av regjeringa. Spørsmålet er kva som skjer på lang sikt, og om partiet greier å halde på dei som no trekkjer til Frp. Eg trur Frp kjem til å forsyne seg av Sp si oppslutning på målingane, men fyrst og fremst av Høgre i endå større grad enn tidlegare.

– Kva er sjansane for at Frp kjem i regjering att?

– Frp kjem truleg til å gjere eit svært godt stortingsval i 2021, men eg trur ikkje Høgre kjem til å gjere noko godt val, og eg er rimeleg sikker på at KrF kjem til å snu att i 2021 og ikkje inngå i noka ikkje-sosialistisk regjering. Difor er dei samla sjansane for ei ikkje-sosialistisk regjering små.

– Trur du Siv Jensen vert sitjande som partileiar no når regjeringsprosjektet er over?

– Ho sit så lenge ho ønskjer, det er eg rimeleg sikker på.

– Kjem du tilbake til partiet?

– Ja, eg håpar det. Men nett no er det næringspolitikk som er fyrsteprioritet for meg.