Raftoprisen til polske Adam Bodnar

EU har ein pågåande straffeprosess mot Polen etter at den polske nasjonalforsamlinga vedtok ein omstridd reform, som EU-kommisjonen meiner kan føre til at domstolane vert underlagde politisk kontroll.

No er den polske juristen og ombodsmannen for menneskerettar, Adam Bodnar, tildelt Raftoprisen for å ha sett søkjelyset på den avgjerande rolla sjølvstendige ombodsmannsinstitusjonar spelar for menneskerettar, både i Polen og i andre land, der aktørar og institusjonar som vernar om grunnleggjande rettar, er under åtak. Juryen skriv at Bodnar har vore ein tydeleg talsmann for demokrati og ein forsvarar av minoritetar og menneskerettar. Raftoprisen vart oppretta i 1986 og er oppkalla etter professor og fredsaktivist Thorolf Rafto.

1700 døde
og sakna

Nær 85.500 flyktningar og migrantar har kryssa Middelhavet og kome til Europa i år. Det syner dei nyaste tala frå FNs høgkommissær for flyktningar, UNHCR. Trafikken over Middelhavet har gått kraftig ned etter at Europa sperra grensene, frå over ein million flyktningar og migrantar i 2015, til like over 362.000 i 2016 og 172.000 i 2017.

Tala for i år inkluderer 80.546 personar som har teke seg over havet til Italia, Hellas, Spania eller Kypros og 4908 som har kome via land til Spania. 1719 personar er i same periode rapporterte døde eller sakna i forsøket på å kome til Europa. Det er framleis syrarar som utgjer den største gruppa personar som kjem via middelhavsområdet.

Kinesisk sinne over svensk satire

Den kinesiske ambassaden i Stockholm har skulda svenske SVT for å spreie rasisme og framandfiendtlegheit etter eit innslag på satireprogrammet Svenska Nyheter førre fredag. I programmet vert det harselert med ein episode der tre kinesiske turistar vart avviste frå ein vandrarheim i Stockholm og måtte fjernast av politiet då dei ikkje ville gå friviljug. Svenska Nyheter laga så ein fiktiv informasjonsfilm til kinesiske turistar til Sverige, derkinesarane råd om å ikkje gjere ifrå seg utanfor historiske bygningar og at om dei ser nokon lufte hunden, er det ikkje fordi dei nett har vore og kjøpt lunsj. Den kinesiske ambassaden kallar filmen ei fornærming og eit vondsinna åtak mot Kina og det kinesiske folket, og har bede om ei unnskyldning frå både SVT og programmet Svenska Nyheter.

eva@dagogtid.no