Embetsstillingar

Vidar Ystad

vidar@dagogtid.no

Det er utnemningane av eigne regjeringskollegaer som vekker reaksjonar.

Oppslaget i førre nummer av Dag og Tid om Solberg-regjeringas utnemningspraksis som er på kollisjonskurs med det Stortinget tidlegare har uttala, får nå etterspel i Stortinget. Det er også sterke reaksjonar på hemmeleghaldet av søknaden til forsvarsminister Frank Bakke-Jensen, som vart utnemnd til fiskeridirektør i september. Hemmeleghaldet vart kritisert av Sivilombodsmannen etter klage frå Dag og Tid.

­– Manglande respekt

– Eg har reagert på desse utnemningane kvar gong. Det gjeld både dei to fylkesmannsutnemningane og stillinga som fiskeridirektør. Den siste utnemninga, av Bakke-Jensen til fiskeridirektør, tek denne praksisen til eit nytt nivå. Her er det snakk om ei sentral stilling i ei fagleg forvaltning, seier Dag Terje Andersen (Ap).

Han er leiar i kontroll- og konstitusjonskomiteen på Stortinget.

– Innhald og implikasjonar av denne praksisen vart grundig presentert i Dag og Tid. Eg finn det skremmande at ikkje regjeringa ser det problematiske i at ein utnemner sine eigne vener og kollegaer. Det vitnar også om manglande respekt for andre søkjarar. Vi vil nå fylgje opp denne saka i Stortinget, seier Andersen, som også er tidlegare stortingspresident.

Han meiner hemmeleghald av søknaden vitnar om at ein har noko å løyne.

­– Politisk tilsetting

Også SV vil fylgje opp denne saka. Det varslar Torgeir Knag Fylkesnes. Han er nestleiar i SV og første nestleiar i næringskomiteen på Stortinget.

– Vi vil nå fremje framlegg i Stortinget om at regjeringa aldri kan utnemne eigne medlemer til nye stillingar. Og eg reknar med at det vil bli fleirtal for eit slikt framlegg, seier Fylkesnes.

Han er i tvil om han vil anerkjenne tilsettinga av Frank Bakke-Jensen som fiskeridirektør.

­– Det er så openbert at det var ei rein politisk tilsetting. For meg står det openbert at han ikkje ville fått denne stillinga om han ikkje sat i regjeringa. Det er kameraderi, og slikt skal vi ikkje ha, seier Fylkesnes.

Dag og Tid har også bede om ein kommentar frå næringsminister Iselin Nybø til kritikken frå Sivilombodsmannen mot hemmeleghaldet av søknaden frå Bakke-Jensen.

– Vi tek til etterretning at Sivilombodsmannen ikkje er samd i avgjerda vår i denne tilsettingssaka, og merkar oss at vi hadde ei anna vurdering av grunnane til unntak enn Sivilombodsmannen. Vi tek med oss utsegna i framtidige prosessar som gjeld unntak av offentleggjering av søkjarar, seier Nybø.