Per Anders Todal

peranders@dagogtid.no

Som samferdsleminister likestilte Ketil Solvik-Olsen elsparkesyklane med vanlege syklar. Det vedtaket står han inne for.

– Eg meiner det var heilt rett å tillate både elsykkel og elsparkesykkel. Problemet er ikkje at det manglar reglar, men at folk ikkje følgjer reglane, seier Solvik-Olsen, som no er nestleiar i Framstegspartiet.

– Det er to hovudproblem med bruken av elsparkesyklane: Folk køyrer for fort på fortaua, og det skaper kaos i gatebiletet når folk slengjer dei frå seg. Det er ikkje regelverket som er problemet, men kulturen.

– I 2018 kunne du neppe sjå for deg kor mange elsparkesyklar som skulle kome dei neste åra?

– Vi såg for oss at bruken av elsparkesykkel kom til å ta seg opp. Men forsøplinga av byrommet vart mykje verre enn eg hadde venta.

– Det er over 20.000 elektriske sparkesyklar i Oslo, truleg fleire enn nokon anna by i Europa. Er det eit sunt tal?

– Kva som er rett tal elsparkesyklar, kjem an på kva folk brukar dei til. Om det fører til at færre køyrer bil i byen, er det sunt. Om dei slengjer dei frå seg i gatene, er det ikkje sunt. 20.000 vekkslengde syklar er kaos og tragedie.

– Når du les om svaksynte som snublar i elsparkesyklane og slår seg til blods, hender det at du lurer på kor lurt vedtaket dykkar var?

– At elsparkesykkel er lovleg, inneber ikkje at det lov å parkere kor som helst. Her må kommunane rydde opp. Politiet må handheve dei reglane som gjeld, og media må formidle at det ikkje er fritt fram.

– Når Bergen og Trondheim har prøvd å regulere talet på utleigarar og sparkesyklar, har dei lidd nederlag i retten?

– Da må dei sjå om vi har dei rette reglane å regulere dette etter. Det burde ikkje ta fleire år å få eit regelverk på plass. Dei lokale styresmaktene har brukt for mykje tid på å sutre og klage over vedtak frå regjeringa. Det finst høve til å regulere dette lokalt, men ein må bruke regelverket rett.

– Samferdselsdepartementet har endra forskrifter, og stortingsfleirtalet vil endre lovverket. Det er vel ei erkjenning av at reglane ikkje var tilstrekkelege?

– Kanskje, eller kanskje har ein ikkje klart å praktisere regelverket godt nok. Eg håpar uansett dette endar med at elsparkesyklane blir ein naturleg del av trafikkbiletet, utan å skape bryderi for andre.