«Eg har HEIMEEKSAMEN i dag.

Treng difor RO og FRED fram til 14.00.

TUSEN TAKK!»

Eg strekar endå ein gong over alle bokstavane, signerer med namnet mitt og smeller toppa attende på sprittusjen. Eg er attende i 2012. Årseining i engelsk. Eksamensperioden er så vidt i gang. Deretter klistrar eg lappen godt fast på utsida av døra til rommet mitt – med to lag tape – og ein til, på ytterdøra. Sagt frå på førehand har eg òg, men etter musikkstudenten i hybelen ved sida av å døme ligg eksamenståka så tett at det vert reint for mykje å be han om å gå stilt i dørene.

Stadig fleire eksamenståkete studentar fuskar på eksamen, skriv Dagens Næringsliv denne veka. Felles klagenemnd handsama 67 klager i 2017, men har fått nærare 60 klagesaker berre det første halvåret i 2018. Dessutan meiner nemnda at mørketala er høge. Og når studentane juksar seg til gode resultat, er det ofte på heimeeksamen. Då sit ikkje eksamensvakta ved døra og ser på ein. Klagenemnda har sett fuskesaker der studentar tek med seg fagbøker på ein minnepinne, og til og med nyttar spionverkty for å få tak i eksamensoppgåvene. Dagbladet melde dessutan i fjor at nokre studentar ved Norges handelshøyskole nytta chatteappen Jodel for å spørje om oppgåvesvar anonymt.

– Dei gav meiningslause svar, sa førsteamanuensis Trond Vegard Johannessen.

Men er presset på studentane verkeleg så stort at dei må ty til spionverkty for å stå?

Ja, meiner studentleiar Susann Biseth-Michelsen ved Universitetet i Oslo. Presset på studentane kan verte umenneskeleg når dei berre har fire timar på å vise alt dei kan. Stryk dei, kan det gå ut over studieprogresjon, lån og økonomi, meiner ho.

Eg vert så irritert at eg er på grensa til å kjøpe rynkefjerningskrem til den sinte avgrunnen i panna. Eg skjønar at det er surt å verte teken for juks om ein har gløymt å vise til éi kjelde på rett måte. Eg kan òg kjenne mageverken eg hadde ei heil veke etter den eine gongen eg strauk på eksamen. Men eg tok han på nytt og stod. Og økonomien min klara seg, for omgjeringslånet vart ikkje rekna ut før eg var ferdig med utdanninga.

Studentleiaren ved Universitetet i Oslo føreslår å innføre mappevurdering, slik at presset ikkje vert så stort. Men for å få ta vanleg eksamen må dei fleste òg levere arbeidskrav jamleg gjennom semesteret. Desse får ein respons og rettleiing på.

Så: Er det for vanskeleg å stå på eksamen, eller er generasjon prestasjon rett og slett ikkje nøgde med mindre enn ein A?

Attende på hybelen har eg fått eksamensoppgåva tilsendt. Google freistar meg når eg ser oppgåva om amerikansk historie. Eg tenkjer på Algerie i Afrika, der dei vil slå av både mobilnett og internett i heile landet i ein time etter at eksamen er i gang for å hindre juks. Likevel svevar markøren min lenge over Chrome-symbolet.