Dag og Tid har sendt tre spørsmål til Digitaliserings- og forvaltningsdepartementet med utgangspunkt i Teknologirådets undersøking om offentleg sporing. Det første tek utgangspunkt i at dei offentlege nettstadene Helsetilsynet.no og ung.no hadde aktivert Google-verktøyet Doubleclick, som er ein automatisert annonsebørs. Er dette problematisk?

Statssekretær Tomas Norvoll (Ap) svarer på e-post:

– Det er eit grunnleggjande prinsipp i statens kommunikasjonspolitikk at vi skal sørgje for at relevant og riktig informasjon når fram til innbyggjarane. Alle offentlege verksemder er sjølv ansvarlege for å etterleve personvernregelverket, mellom anna prinsippet om ikkje å samle inn og behandle fleire personopplysningar enn nødvendig. Dette betyr at alle må vurdere både om dei har heimel, og om det er klokt å dele personopplysningar med annonsebørsar.

– Er personvernet på offentlege nettsider godt nok?

– Vi er opptekne av at personvernet vert godt sikra, og vil oppmode alle offentlege verksemder til å vurdere nøye kva for analyse- og sporingstenester dei nyttar i kommunikasjonen sin. Det er viktig at innbyggjarane kan ha tillit til at personvernet vert sikra når dei bruker offentlege tenester og nettstader.

– Vil regjeringa gjere noko for å følgje opp funna i rapporten frå Teknologirådet?

– Regjeringa arbeider no med ein ny nasjonal digitaliseringsstrategi, som også skal innehalde ein personvernstrategi. Vi vil ta med oss funna i Teknologi­rådets rapport inn i dette arbeidet saman med ei rekkje andre gode innspel vi har fått.