2. august: Aisha al-Hassan (40) og den fire år gamle sonen Hussein Salem blir alvorleg skadde da okkupasjonsstyrkar skyt mot landsbygda utanfor byen Tel Tamer. Styrkane bruker bombekastarar og tungt artilleri mot landsbyen Al-Dardara. Ein reporter frå Hawar rapporterer at befolkninga blir fordriven frå denne og andre landsbyar i området.

4. august: Tyrkiske styrkar og leigesoldatar skyt med tungt artilleri mot Tal al-Ward, Rabiat, Umm al-Kif og andre landsbyar i Zrgan-distriktet. Utpå kvelden skyt dei mot den assyriske landsbyen Tel Shanan.

I eit angrep med tanks klokka halv tre om natta drep soldatane fire personar i ein familie som bur i landsbyen Safavid, ikkje langt frå byen Ain Issa. 54 år gamle Zidan Khalaf al-Asa og borna Ziad, Mona og Hoda mistar livet. Borna er mellom åtte og ti år gamle. Mora og ei eldre dotter vert alvorleg skadde.

7. august: Tyrkiske soldatar set enda ein gong fyr på fleire skogkledde område i Afrin.

Leigesoldatar bortfører 30 år gamle Shukri Ahmad Kendy frå landsbyen Hammam-al-Turkmen, ikkje langt frå den tyrkiske grensa. Han har levd som flyktning i Aleppo. Etter at far hans betaler 20.000 dollar til leigesoldatane, får han kome heim. Dei lovar at ingen vil angripe han.

11. august: Leigesoldatar bortfører Aziz, med kallenamnet Abu Nidal, i landsbyen Arende i den okkuperte Afrin-provinsen. Dei krev 7000 dollar i løysepengar for å sleppe han fri og la han få tilbake eigedommen sin.

12. august: 15 år gamle Mohammed Mohammed og ein annan ungdom steller med husdyra ved landsbyen Miasa i Afrin-provinsen. Mohammed mistar livet da han går på ei mine som leigesoldatar har grave ned. Den andre blir alvorleg skadd.

Tyrkisk etterretning og leigesoldatar kidnappar to kvinner og eit spedbarn i landsbyen Hammam-al-Turkmen.

Leigesoldatar høgg ned 130 oliventre i to landsbyar i Afrin-provinsen.

29. juli stengte Tyrkia vasstilførsla til vassverket i Tel Tamer og dermed tilgangen på reint vatn for hundretusenar i byane Tel Tamer, Hasakah, Shaddadi, Hawl og landsbygda rundt. North Press melde i september at stenginga vara i ein månad.

14. august: Eigedomshandel i okkupert område: Ein leigesoldat i SNA (Syrias nasjonale hær), som Tyrkia finansierer, sel huset til kurdaren Juma Mohammed, som bur i landsbyen Khalnireh i Afrin-provinsen. Kjøparen, som betaler 2000 dollar, er ein innflyttar frå Aleppo.

Ein annan leigesoldat, frå Sham-legionen, betaler 1400 dollar for huset og 800 dollar for butikken til kurdaren Rami Ibrahim, som bur i landsbyen Deir Sawan. Seljaren er ein innflyttar frå Qalamoun-området nær Damaskus.

17. august: Hamad Haido, ein offentleg tilsett nord for byen Tel Tamer, seier til North Press at dei har stoppa all offentleg tenesteyting til 23 landsbyar. Han legg til at «livet til tilsette og bebuarane er i fare, ettersom granatar og rakettar fell tilfeldig og til ulike tider på dagen og natta».

18. august: Eit barn mistar livet og eit anna blir skadd mens befolkninga i landsbyane Bab al-Khair, Tal al-Ward og Rabiat flyktar frå tyrkiske angrep med rakettar og artilleri.

22. august: Tyrkia og leigesoldatar gjennomfører angrep mot tolv landsbyar fordelte over heile Nord- og Aust-Syria. Dei bruker stridsvogner, bombekastarar og artilleri.

26. august: Tyrkiske soldatar og leigesoldatar gjennomfører angrep mot ni landsbyar i Afrin-provinsen og Shehba-området. Dei skyt ein fire år gammal gut i landsbyen Burj Qas.

27. august: Leigesoldatar driv omfattande hogst i skogane mellom Junders og Sheh i Afrin-provinsen. Dei sel tømmer i Tyrkia.