Dag og Tid har spurt Espen Barth Eide om regjeringa kjem til å talfeste eit mål for kor mykje av eigne land- og havareala Noreg skal verne, men har ikkje fått konkret svar. Eide syner i staden til at regjeringa alt arbeider med nytt vern, mellom anna friviljug vern av skog og å ta vare på eit breiare spekter av naturtypar enn det som er verna i dag.

– Det er òg starta arbeid for å etablere fleire nasjonalparkar og landskapsvernområde der det er lokal aksept for det, og vi har ei rekkje område til havs som er i prosess med sikte på vern i løpet av dei neste åra, svarar han i e-post.

Han seier regjeringa òg jobbar med lov- og regelverksendringar som skal styrkje naturomsyn, og at det er varsla utarbeiding av ein ny havmiljølov som skal gje heimel til å opprette marine verneområde i norske havområde også utanfor territorialgrensa ved 12 nautiske mil. Loven skal omfatte soner der vernereglane i naturmangfaldloven ikkje gjeld.