Bonde, statsvitar og tidlegare landbruksforskar Svenn Arne Lie har lenge kritisert den norske kraftfôrbruken, og meiner situasjonen i dag, med overproduksjon av kjøt på eine sida og mangel på eigne fôrressursar på andre, gir ein god illustrasjon på dei problematiske sidene ved utviklinga.

– Vi har laga eit system som gjer at det er god økonomi å ta ned lamma frå fjellet tidlegare og sluttfôre dei med kraftfôr. Dette bryt med heile føresetnaden for saueproduksjon.

Han meiner slaktetilskota for sau og lam burde stillast inn etter andre kriterium enn i dag.

– I dag er ikkje tilskota retta inn etter kvalitet. Dei er retta inn etter kvantitet og vekt, kriterium det er lettast å oppnå ved å fôre med kraftfôr. Men det finst andre måtar å kvalifisere slakt. Vi kunne hatt kriterium som gjekk på balansen mellom omega-6 og omega-3-feittsyrer i kjøtet, krav til beitetid og krav til levetid. Dette handlar om eit større bilete. Vi må vekk frå dagens volumbaserte tilskotssystem. Det må heller jobbast fram eit nytt støttesystem med utgangspunkt i god agronomisk praksis, særleg berekraftige produksjonsmåtar og kriterium for kvalitet, seier Lie.