Jesper Hommefoss Johnsen

jesper@dagogtid.no

Onsdag morgon kunne NRK melde om den verste målinga for Senterpartiet på over fem år. Med 6,9 prosent ligg dei no til og med bak SV – partiet som ikkje fekk lov til å vere med i regjering i fjor haust. Samstundes går regjeringspartnar Arbeidarpartiet fram.

Jenny Klinge sit på Stortinget for Senterpartiet.

– Kvifor går det så dårleg med Senterpartiet om dagen?

– Eg vil minne om at det er spesielle tider. Situasjonen etter at vi kom i regjering, har vore prega av krisehandtering. Så det seier seg sjølv at det å finne løysingar på stadige kriser har vorte prioritert, medan noko av det vi hadde lova å kome raskt i gang med, har måtta vente. Tolmod er ei dygd som eg skulle ønske både vi i partiet og veljarane stundom hadde øvd oss litt på. Vi har trass alt det aller meste av ein fireårsperiode framfor oss enno.

– Så du er ikkje uroa?

– Nei, eg trur det fort kan snu. Eg bryr meg lite om meiningsmålingar. Både når dei er langt nede, og når dei er langt oppe. Vi er enno tidleg i ein stortingsperiode, og det er ingen grunn til å leggje seg i fosterstilling på grunn av dårlege tal. Det er trass alt resultatet ved val som gjev oss høve til å styre.

– Kan det hende de rett og slett lova for mykje i valkampen?

– Det er viktig å hugse at lovnadane kom i ei anna tid. Men vi legg dei ikkje vekk. Vi er berre nøydde til å be om litt meir tid til å utføre det vi hadde tenkt. I politikken tek dessutan ting tid, kriser eller ei.

– Marit Arnstad lova i fjor at de ikkje kunne sitje i regjering om bensinprisen gjekk over 20 kroner. Var valkampen for populistisk?

– Vi lova aldri å halde prisen frå produsentane på under 20 kroner. Det vi var opptekne av, var avgiftsnivået. At prisen aukar på den måten han gjer no, skjer på grunn av den heilt spesielle verdssituasjonen. Dette var ikkje noko ein kunne føreseie. Når det gjeld skuldinga om populisme, synest eg det er heller komisk at kjedelege lovnadar som å ha tenester nær folk skal verte kalla populistiske.

– Du talar om ein endra verdssituasjon. Må nordmenn rett og slett førebu seg på å ha mindre på bok?

– Staten kan ikkje kompensere for alt. Men vi skal gjere vårt beste for å vere der for dei som treng det. Straumstøtteordninga er eit døme på ei ordning som tar vekk dei verste toppane av straumrekninga, og som gjer at det forhåpentlegvis vert handterleg for folk.

– No kan det sjå ut til at straumprisane held seg høge fram til hausten. Vi kan ikkje drive å kompensere for alltid?

– Det vil vere naturleg å ta ei ny vurdering etter kvart. Straumstøtteordninga er i første omgang forlenga med eit år. Det gjer situasjonen meir føreseieleg for folk flest.

– SV er større enn dykk på siste måling. Var det ein tabbe å ikkje ta dei med inn i regjering?

– SV hadde sine grunnar til ikkje å ville vere med. No er dei i ein velsigna posisjon der dei kan stå utanfor og rope. Kvar gong vi legg fram ei ordning, kan dei forhandle fram ei litt betre ordning, og så verkar det som om dei vil ha æra for heile pakka. Dei får uforholdsmessig mykje merksemd for løysingane dei er med på å bidra til. Brorparten av det som vert lagt fram, er det regjeringa som står for, og ikkje SV. Stundom skulle eg ønskje vi kunne halde eit kurs for veljarane for å forklare dei korleis ting heng saman.

– Så du meiner veljarane er for dumme?

– Nei, men både vi og veljarane druknar for tida. Det handlar ikkje om evna til å oppfatte, men om at vi rett og slett vert bombardert med krisenytt. Då er det vanskeleg å få journalistane til å skrive om det positive vi gjer. Og då får heller ikkje veljarane det med seg.

– Kva har de fått til, som vi ikkje har fått med oss?

– Vi har både lagt inn meir i statsbudsjettet til politiet og sørga for at mindreforbruket på éin milliard frå i fjor vert fordelt på ulike politidistrikt. Det er verkeleg ei oppfølging av lovnadane våre om meir nærpoliti og styrking av politidistrikta. Og så er vi i ferd med å reversere domstolreforma. Dette er heilt konkrete saker der vi er i ferd med å oppfylle forventningane, men som folk knapt får med seg på grunn av alt anna.

– Din eigen partileiar får mykje kritikk for at han ikkje kler rolla som finansminister. Har Trygve Slagsvold Vedum noko av skulda for at det går så dårleg som det gjer for tida?

– Eg synest at også dette er litt komisk. Før valet vart han kritisert for ikkje å vere statsmann nok. Når han så kjem i finansministerstolen og oppfører seg som ein statsmann, får han kritikk for at han ikkje flirer like mykje som før. Om han skulle sprotte rundt og flirt like mykje som før, trur eg det hadde kome massiv kritikk andre vegen.

– Kva må til for å snu trenden?

– Vi må ta den jobben vi har, seriøst. Eg trur at om vi held fram med det, vil situasjonen rundt oss etter kvart endre seg. Då vert det òg større plass til dei sakene som vi er opptekne av.