Det er laurdag 27. august 2022, eg vaknar til nyhenda om at skodespelar Espen Skjønberg døydde i går. Eldre lesarar kjende han nok best frå teaterscena og norsk film, men eg, og mange frå generasjonen min, kjente han utvilsamt best som Haakon Frydenlund i Familiesagaen De syv søstre som gjekk på TV 2 frå 1996 til 2000, med ein kjenningsmelodi eg framleis nynnar på når eg er i laurdagskveldmodus.

Haakon er gift med Nelly (spela av Mona Hofland, som òg var kona hans på ekte), saman har dei sonen Trygve som er gift med Silje, som igjen er foreldra til Steinar og Tonje. Trygve ligg i koma store delar av serien, heilt til han, idet han skal til å vakna, vert kvelt med ei hovudpute av Walter, sonen Nelly har frå krigsåra.

Familien Frydenlund var ein av kjernefamiliane me møtte i familiesagaen. Ein annan var familien Birkeland, med homofobe, seinare homofile, Frode som far og fitnessdronning og tidlegare frøken Noreg, Billeba, som mor. Borna deira, Atle og Gry, var høvesvis kjærestar med Frydelundane Steinar og Tonje.

Så, tilbake til 27. august 2022. Eg har nett lese nyhenda om at Haakon er død, når eg køyrer til butikken. Eg går inn, finn det eg skal ha og går mot den sjølvbetente kassa, skannar varer og coopmedlemskapet, betalar og går til sides, gjev plass til nestemann i køen. Eg kvepp til når eg møter blikket til dama bak meg, som nikkar smilande før ho skannar inn appelsinisen sin. Det er Gry. Gry Birkeland! Eller Stine Indrelid, som ho eigentleg heiter! Kjærasten til Steinar (faktisk var dei ei tid kjærestar på ekte òg, nett som Espen og Mona), ho som alt før fyrste episode var valdteken av vonde Bjarte, vart gravid og fekk jenta Madonna, oppkalla etter Madonna, som Steinar tok til seg som si eiga!

Eg har ikkje tenkt på verken Haakon eller Gry på lenge, men så kjem dei inn i føremiddagen min, begge to, på kvar sine måtar.

Livet er fullt av tilfeldige opplevingar.

Clementine