«Prøv vår deilige digitale meny», oppmodar SJ Nord kvar gong eg reiser med Dovrebanen.

At det no er SJ Nord og ikkje Vy eller NSB som køyrer Dovrebanen, har ikkje så mykje å seie for ein pendlar. Det meste er som før, men dessverre har menyen tapt seg.

Vegetarpizzaen som Vy tilbaud, såg ut som ein pizza og smakte heller ikkje så verst, særleg ikkje med ruccola på toppen. Vegetarpizzaen som SJ Nord tilbyr, er ein leiv med noko smelta ost på, som eg rett nok kan få ruccola til.

Sist eg drog austover, hadde det vore flust med heilagdagar og ingen opne butikkar. Difor hadde eg ikkje med meg niste, men satsa på å ete i «Kafé motsatt vei».

Medan eg stod i køen, skjønte eg at dei var utselde for både eitt og hitt. Det eine var vegetarpizzaen som eg, trass i dårleg erfaring, likevel hadde tenkt å ty til. Då eg spurde om dei hadde andre varme vegetarrettar på menyen, tilrådde den unge kvinna ein nudelrett.

Glad for at dei hadde eit vegetarisk alternativ, takka eg ja. Då maten kom på bordet, var han dekt med noko som likna mistenkjeleg på kjøt. Kunne ho eller eg ha misforstått noko?

Eg tok ein kik i den digitale menyen og forstod kva eg hadde kjøpt: «Nudler med pulled BBQ VegMe, wokgrønn­saker og hjemmelaget chili crispdressing.» Eg hadde altså fått ein vegansk rett med eit skinkesubstitutt som såg ut som varmebehandla kjøt, men som smakte som altfor salt avskjer av viskelêr. Hadde eg visst at det var det eg fekk, ville eg ha takka nei. Løysinga vart å skubbe all «pulled BBQ VegMe» til sides og prøve å nyte resten.

Gjennom ein mannsalder har eg svart på alle kundeundersøkingar eg har fått tilgang til, for å prøve å påverke NSB og seinare Vy og SJ Nord til å få eit betre vegetarmattilbod. I byrjinga var vaflar og gjærbakst einaste alternativ. Ingen varmrett utan kjøt. Tilbodet har kome seg, men det er framleis ikkje godt nok.

Neste gong eg tek toget, skal eg prøve den digitale menyen medan eg et nista mi.

Tiriltunga