I dag gjekk eg og tok ein oppfriskingsdose mot koronaviruset. Eg hadde som von at eg skulle få den nye varianten av Moderna, men han var ikkje komen enno, så det vart til at eg igjen takka ja til den nye frå Pfizer, som eg har teke tre gonger før. Men no er eg altså oppdatert mot ulike omikronvariantar, noko eg neppe hadde trong for, sidan eg fekk omikron alt i slutten av februar.

Kvifor eg tok endå ein dose, sjølv om FHI seier eg ikkje har trong til det? Av di eg ikkje har lyst til å verta så sjuk i jola som eg vart då eg fekk omikron i februar. Trur eg dosen hjelper særleg? Nei, i grunnen ikkje. Men eg kan alltids vona.

Eg vart sitjande og prata med kvinna som skulle setja dosen. Ho hadde særs god tid, sidan nesten ingen under 65 har tinga ein oppfriskingsdose.

– Folk verkar ikkje så interesserte lenger. Dei er nok leie av både vaksinar og snakk om covid-19.

– Hugsar du heilt til å byrja med, då FHI ville ha gradvis smitte og vi skulle få flokkimmunitet?

– Ja, sett i ettertid var det underlege saker. Korleis kunne vi få flokkimmunitet mot eit koronavirus?

– Så var vona vaksine?

– Ja, det skulle stogga sjukdomen. Det gjekk ikkje, det heller.

– Kva meiner du at om at eg tek ein fjerde dose, då?

– Det er ditt val. Du kan vel truleg rekna med litt lægre sjanse for å verta smitta eit par månader framover. Men det viktigaste er nok at du har fått to dosar i kombinasjon med at du har vore smitta. Det er grunnvernet mot alvorleg sjukdom. Å halda fram med å taka vaksine to–tre gonger om året er vel ikkje så berekraftig. Men dei gamle kan kanskje få ein oppdatert vaksine i kombinasjon med influensavaksine. Vi andre får vel berre seia oss ferdig med heile greia snart, konkluderte kvinna.

FHI på si side har slutta å oppdatera tala for døde av eller med covid-19. Det vi veit, er at langt fleire har døydd av covid-19 i år enn dei føregåande åra, og at dei samla dødstala i Noreg vert rekordhøge i år.

No veit de det. Eg på mi side trur ikkje eg tek fleire oppfriskingsdosar. Men det har eg sagt før.

JH